Beısenbi, 26 aqpan kúni, «Ádiletti ári Progresıvti Qazaqstannyń Halyqtyq Konstıtýsıasy úshin» jalpyulttyq koalısıasynyń músheleri Aqtóbe oblysynyń aktıvimen kezdesti. İs-shara barysynda Memlekettik keńesshi Erlan Qarın eldiń jańa Ata Zań jobasy qalaı ázirlengeni týraly mańyzdy ári qyzyqty derektermen bólisti, dep habarlaıdy Dalanews.kz

Onyń aıtýynsha, Prezıdent tek reformalarǵa bastamashy bolyp qana qoımaı, jańa Konstıtýsıanyń negizgi erejeleriniń tikeleı avtory boldy.

«Prezıdenttiń memlekettik qundylyqtarǵa degen qasterli ári muqıat kózqarasynyń jarqyn kórinisteriniń biri – mátindermen jumys isteý mádenıeti. Memleket basshysy Qasym-Jomart Kemeluly túrli qujattarmen jumys istegende, óziniń sóıleıtin sózderinde «Egemendik» jáne «Táýelsizdik» uǵymdaryn árdaıym bas árippen jazady», – dep atap ótti Erlan Qarın.

Memlekettik keńesshiniń pikirinshe bul jaı ǵana stılısıkalyq erekshelik emes, eldiń joǵary basshylyǵy ustanatyn qaǵıdatty ustanym.

«Prezıdenttiń oıynsha, bizdiń de pikirimizshe, bul sózder – qasıetti, qasterli uǵymdar. Ata Zańnyń jańa mátininde de osy ustanym saqtaldy», – dedi ol.

Erlan Qarınniń sózinshe, Prezıdenttiń tájirıbesi mol – ol memlekettik jáne halyqaralyq deńgeıdegi eń joǵary laýazymdarda qyzmet atqardy. Mundaı qyzmetterde árbir sózdiń dáldigi úlken mánge ıe. Sol sebepti de tujyrymdarǵa aıryqsha muqıat qaraıdy.

«Ol uzaq jyldar boıy Parlamentte, Úkimette, Halyqaralyq uıymdarda qyzmet atqardy. Sol sebepti, qujattarmen jumys isteýdiń núanstaryn, erekshelikterin jaqsy biledi. Árbir sózdiń salmaǵyn jaqsy túsinedi. Muqıat qaraıdy», – dedi Erlan Qarın.

Onyń aıtýynsha, Qasym-Jomart Toqaev reformalarǵa jalpy basshylyq jasaýmen shektelmeı, jańa Ata Zańnyń árbir erejesin jeke ózi muqıat ázirleýge tikeleı aralasqan. Prezıdenttiń tikeleı bastamasymen Konstıtýsıaǵa irgeli ózgerister engizildi.

«Memleket basshysy Parlamenttik jáne Konstıtýsıalyq reformalar aıasynda usynylǵan árbir bastamany jeke ári egjeı-tegjeıli zerdeledi. Sondyqtan jańa Konstıtýsıadaǵy negizgi ári qaǵıdatty ózgeristerdiń kóbin ol ózi usyndy. Mysaly, jańa Preambýla Prezıdenttiń tujyrymdamalyq tezısteri negizinde ázirlendi. Sol sıaqty jańa Konstıtýsıadaǵy úlken jańashyldyqtardyń, ásirese qarapaıym azamattardyń múddesin qorǵaıtyn jańa normalardyń avtory da – ózi», – dep atap ótti Memlekettik keńesshi.

Sóz sońynda Erlan Qarın Jańa Konstıtýsıada Memleket basshysynyń anyq qoltańbasy bar ekenin jetkizdi. Onyń aıtýynsha, Qasym-Jomart Kemelulyn qujattyń negizgi basty avtorlarynyń biri desek te esh qatelespeımiz.

Eske sala keteıik, Prezıdent Jarlyǵymen jańa Konstıtýsıa jobasy 2026 jylǵy 15 naýryzda ótetin respýblıkalyq referendýmǵa shyǵaryldy. Qujatty talqylaý jarty jylǵa sozylyp, azamattardan, sarapshylardan, saıası partıalar men uıymdardan túsken myńdaǵan usynystar eskerildi.