Bloger Saia Manarbekqyzy Almatydaǵy Kóktóbe demalys aimaǵyndaǵy qyzmet qunynyń qymbattaǵanyn synǵa alyp, otbasylyq demalys kópshilikke qoljetimsiz bolyp bara jatqanyn atap ótti, dep habarlaidy Dalanews.kz.
Onyń sózinshe, Kóktóbede kóptegen qyzmet aqyly ári baǵasy joǵary.
“Kóktóbege kelip, baǵalardy kórip, jaǵamdy ustadym. Munda bári qymbat, bári aqyly. Tipti dárethanaǵa kirý quny - 100 teńge”, - dedi ol.
Saia Manarbekqyzy ásirese otbasymen keletinder úshin shyǵyn kólemi aitarlyqtai artatynyn alǵa tartty. Onyń málimetinshe, jeke kólikpen joǵary kóterilý quny — shamamen 25 myń teńge. Tipti kólikti tómende qaldyryp, marshrýtpen kóterilgen jaǵdaida da birneshe adamǵa bul edáýir qymbatqa túsedi.
“Mysaly, bes-alty adamnan turatyn otbasy úshin eki baǵytqa jol aqysy shamamen 4 myń teńgeden asady. Bul - qarapaiym serýen úshin qymbat”, - dedi bloger.
Sondai-aq ol aspaly jol qyzmetiniń baǵasy da joǵary ekenin atap ótti.
“Bir baǵytqa bilet shamamen 6 myń, al eki baǵytqa 10 myń teńge. Bul bizdiń azamattar úshin óte qymbat”, - dedi ol.
Jýrnalist buǵan deiin de Shymbulaqtaǵy baǵa saiasaty týraly másele kótergenin eske salyp, Qazaqstan azamattary men shetel azamattary úshin eki túrli tarif engizýdi usyndy.
“Kóp elde qoldanylatyn eki tarif júiesin engizý kerek dep oilaimyn. Óz azamattarymyzǵa demalys oryndary qoljetimdi bolýy tiis”, - dedi Saia Manarbekqyzy.
Onyń pikirinshe, baǵanyń qymbattaýy saldarynan keibir otbasylar mundai oryndarǵa barýdan bas tartyp, úide qalýǵa májbúr.
