بلوگەر سايا ماناربەك قىزى الماتىداعى كوكتوبە دەمالىس ايماعىنداعى قىزمەت قۇنىنىڭ قىمباتتاعانىن سىنعا الىپ، وتباسىلىق دەمالىس كوپشىلىككە قولجەتىمسىز بولىپ بارا جاتقانىن اتاپ ءوتتى، دەپ حابارلايدى Dalanews.kz.

ونىڭ سوزىنشە، كوكتوبەدە كوپتەگەن قىزمەت اقىلى ءارى باعاسى جوعارى.

“كوكتوبەگە كەلىپ، باعالاردى كورىپ، جاعامدى ۇستادىم. مۇندا ءبارى قىمبات، ءبارى اقىلى. ءتىپتى دارەتحاناعا كىرۋ قۇنى - 100 تەڭگە”، - دەدى ول.

سايا ماناربەك قىزى اسىرەسە وتباسىمەن كەلەتىندەر ءۇشىن شىعىن كولەمى ايتارلىقتاي ارتاتىنىن العا تارتتى. ونىڭ مالىمەتىنشە، جەكە كولىكپەن جوعارى كوتەرىلۋ قۇنى — شامامەن 25 مىڭ تەڭگە. ءتىپتى كولىكتى تومەندە قالدىرىپ، مارشرۋتپەن كوتەرىلگەن جاعدايدا دا بىرنەشە ادامعا بۇل ەداۋىر قىمباتقا تۇسەدى.

“مىسالى، بەس-التى ادامنان تۇراتىن وتباسى ءۇشىن ەكى باعىتقا جول اقىسى شامامەن 4 مىڭ تەڭگەدەن اسادى. بۇل - قاراپايىم سەرۋەن ءۇشىن قىمبات”، - دەدى بلوگەر.

سونداي-اق ول اسپالى جول قىزمەتىنىڭ باعاسى دا جوعارى ەكەنىن اتاپ ءوتتى.

“ءبىر باعىتقا بيلەت شامامەن 6 مىڭ، ال ەكى باعىتقا 10 مىڭ تەڭگە. بۇل ءبىزدىڭ ازاماتتار ءۇشىن وتە قىمبات”، - دەدى ول.

جۋرناليست بۇعان دەيىن دە شىمبۇلاقتاعى باعا ساياساتى تۋرالى ماسەلە كوتەرگەنىن ەسكە سالىپ، قازاقستان ازاماتتارى مەن شەتەل ازاماتتارى ءۇشىن ەكى ءتۇرلى تاريف ەنگىزۋدى ۇسىندى.

“كوپ ەلدە قولدانىلاتىن ەكى تاريف جۇيەسىن ەنگىزۋ كەرەك دەپ ويلايمىن. ءوز ازاماتتارىمىزعا دەمالىس ورىندارى قولجەتىمدى بولۋى ءتيىس”، - دەدى سايا ماناربەك قىزى.

ونىڭ پىكىرىنشە، باعانىڭ قىمباتتاۋى سالدارىنان كەيبىر وتباسىلار مۇنداي ورىندارعا بارۋدان باس تارتىپ، ۇيدە قالۋعا ءماجبۇر.