Qazaqstannyń Joǵarǵy soty adamnyń jynystyq qolsuǵylmaýshylyǵy men jynystyq erkindigine qarsy qylmystarǵa qatysty ister boiynsha normativtik qaýly qabyldady, dep habarlaidy Dala news.
Plenarlyq otyrysty Joǵarǵy sot tóraǵasy Aslambek Mergaliev ótkizdi. Jiynǵa Joǵarǵy sot alqalarynyń tóraǵalary men sýdialary, ǵalymdar, ǵylymi-konsýltativtik keńes músheleri, sot ákimshiliginiń, Bas prokýratýranyń, IIM men Ádilet ministrliginiń, sondai-aq advokatýra ókilderi qatysty.
Otyrysta «Adamnyń jynystyq qolsuǵylmaýshylyǵyna jáne jynystyq erkindigine qarsy qylmystyq quqyq buzýshylyqtar týraly ister boiynsha sot tájiribesiniń keibir máseleleri týraly» normativtik qaýly jobasy talqylanyp, daýys berý nátijesinde qabyldandy.
Joǵarǵy sot sýdiasy Esenbai Boranbaev qujatty tanystyra otyryp, bul sanattaǵy qylmystardyń qoǵamdyq qaýiptiligi joǵary ári saldary aýyr ekenin atap ótti. Onyń aitýynsha, qaýly sot tájiribesin birizdendirýge jáne qylmysty saralaý kezinde týyndaityn túsinbeýshilikterdi joiýǵa baǵyttalǵan.
Qujatta zorlaý, seksýaldyq sipattaǵy kúsh qoldaný áreketteri jáne ózge de seksýaldyq sipattaǵy is-áreketter uǵymdarynyń mazmuny naqty aiqyndalǵan.
Sýdia Janna Volkova qaýlyda sondai-aq seksýaldyq sipattaǵy áreketterge májbúrleý, azǵyndyq áreketter jáne seksýaldyq sipattaǵy tiisý túsinikteri ashyp kórsetilgenin aitty. Budan bólek, «qaitalanýshylyq» belgisi boiynsha saralaý máseleleri túsindirilgen.
Joǵarǵy sot sýdiasy Nýrjan Joldasbekov sońǵy jyldary Qylmystyq kodekske engizilgen ózgeristerge bailanysty sot tájiribesinde týyndaityn máselelerge jan-jaqty túsindirme berilgenin atap ótti.
Sondai-aq qujatta kámeletke tolmaǵan kýágerler men jábirlenýshilerdiń aiǵaqtaryn deponirleý tártibine erekshe nazar aýdarylǵan. Bul olardyń quqyqtary men protsessýaldyq kepildikterin qamtamasyz etý úshin mańyzdy qadam retinde baǵalandy.
