قازاقستاننىڭ جوعارعى سوتى ادامنىڭ جىنىستىق قولسۇعىلماۋشىلىعى مەن جىنىستىق ەركىندىگىنە قارسى قىلمىستارعا قاتىستى ىستەر بويىنشا نورماتيۆتىك قاۋلى قابىلدادى، دەپ حابارلايدى Dala news.
پلەنارلىق وتىرىستى جوعارعى سوت ءتوراعاسى اسلامبەك مەرگالييەۆ وتكىزدى. جيىنعا جوعارعى سوت القالارىنىڭ ءتوراعالارى مەن سۋديالارى، عالىمدار، عىلىمي-كونسۋلتاتيۆتىك كەڭەس مۇشەلەرى، سوت اكىمشىلىگىنىڭ، باس پروكۋراتۋرانىڭ، ءىىم مەن ادىلەت مينيسترلىگىنىڭ، سونداي-اق ادۆوكاتۋرا وكىلدەرى قاتىستى.
وتىرىستا «ادامنىڭ جىنىستىق قولسۇعىلماۋشىلىعىنا جانە جىنىستىق ەركىندىگىنە قارسى قىلمىستىق قۇقىق بۇزۋشىلىقتار تۋرالى ىستەر بويىنشا سوت تاجىريبەسىنىڭ كەيبىر ماسەلەلەرى تۋرالى» نورماتيۆتىك قاۋلى جوباسى تالقىلانىپ، داۋىس بەرۋ ناتيجەسىندە قابىلداندى.
جوعارعى سوت سۋدياسى ەسەنباي بورانبايەۆ قۇجاتتى تانىستىرا وتىرىپ، بۇل ساناتتاعى قىلمىستاردىڭ قوعامدىق قاۋىپتىلىگى جوعارى ءارى سالدارى اۋىر ەكەنىن اتاپ ءوتتى. ونىڭ ايتۋىنشا، قاۋلى سوت تاجىريبەسىن بىرىزدەندىرۋگە جانە قىلمىستى سارالاۋ كەزىندە تۋىندايتىن تۇسىنبەۋشىلىكتەردى جويۋعا باعىتتالعان.
قۇجاتتا زورلاۋ، سەكسۋالدىق سيپاتتاعى كۇش قولدانۋ ارەكەتتەرى جانە وزگە دە سەكسۋالدىق سيپاتتاعى ىس-ارەكەتتەر ۇعىمدارىنىڭ مازمۇنى ناقتى ايقىندالعان.
سۋديا جاننا ۆولكوۆا قاۋلىدا سونداي-اق سەكسۋالدىق سيپاتتاعى ارەكەتتەرگە ماجبۇرلەۋ، ازعىندىق ارەكەتتەر جانە سەكسۋالدىق سيپاتتاعى ءتيىسۋ تۇسىنىكتەرى اشىپ كورسەتىلگەنىن ايتتى. بۇدان بولەك، «قايتالانۋشىلىق» بەلگىسى بويىنشا سارالاۋ ماسەلەلەرى تۇسىندىرىلگەن.
جوعارعى سوت سۋدياسى نۋرجان جولداسبەكوۆ سوڭعى جىلدارى قىلمىستىق كودەكسكە ەنگىزىلگەن وزگەرىستەرگە بايلانىستى سوت تاجىريبەسىندە تۋىندايتىن ماسەلەلەرگە جان-جاقتى تۇسىندىرمە بەرىلگەنىن اتاپ ءوتتى.
سونداي-اق قۇجاتتا كامەلەتكە تولماعان كۋاگەرلەر مەن جابىرلەنۋشىلەردىڭ ايعاقتارىن دەپونيرلەۋ تارتىبىنە ەرەكشە نازار اۋدارىلعان. بۇل ولاردىڭ قۇقىقتارى مەن پروسەسسۋالدىق كەپىلدىكتەرىن قامتاماسىز ەتۋ ءۇشىن ماڭىزدى قادام رەتىندە باعالاندى.
