Temirtaýda zeinetkerdi qorlaǵan aiyptalýshylarǵa qatysty prokýror naqty bas bostandyǵynan aiyrý jazasyn taǵaiyndaýdy surady, dep habarlaidy Dalanews.kz agenttigi QazTag-qa silteme jasap.
Aiyptaýshy taraptyń málimetinshe, toǵyz adamnan turatyn toptyń basym bóligi - jasóspirimder. Prokýror sottan olardy 5 jyldan 5,5 jylǵa deiin bas bostandyǵynan aiyrýdy surady.
"Qylmystyń qoǵamdyq qaýiptiligin, aldyn ala sóz bailasý arqyly top bolyp jasalǵanyn, bóten turǵyn úige zańsyz kirip, egde jastaǵy jábirlenýshige aýyr dene jaraqatyn salǵanyn eskere otyryp, aiyptalýshylarǵa bas bostandyǵynan aiyrý jazasyn taǵaiyndaý qajet dep sanaimyn", - dedi prokýror jaryssóz barysynda.
Is materialdaryna sáikes, aiyptalýshylar zeinetkerdi qorlap qana qoimai, tonaý baby boiynsha da jaýapqa tartylyp otyr. Qazir sottalýshylar kinálaryn ishinara moiyndap, ózderin bostandyqtan aiyrmaýdy suraǵan.
Eske salaiyq, bul is qoǵamda úlken rezonans týdyrǵan bolatyn. Tergeý nusqasyna sáikes, 2025 jyldyń naýryzynda bir top adam aldap kirip, páterinde otyrǵan 67 jastaǵy er adamdy soqqyǵa jyǵyp, qorlaǵan. Olar áreketterin videoǵa túsirgen. Oqiǵadan taǵy bir adam da zardap shekken.
Qorlyq sátteri túsirilgen video áleýmettik jelide taralyp, qoǵamda qatty narazylyq týǵyzdy. Jurtshylyq jasóspirimderge qatań jaza berýdi talap etken.
Keiin bul jaǵdai jańa janjalǵa ulasyp, zeinetkerdi qorlady degen kúdikke ilingenderdiń keibirin ózge jastar soqqyǵa jyqqan. Bul oqiǵa qoǵamda «óz betinshe jaza qoldaný» retinde baǵalandy. Aiyptalýshylardyń ata-analaryna da qoqan-loqy jasalǵany aityldy.
Oqiǵadan keiin Temirtaý ákiminiń áleýmettik máseleler jónindegi orynbasaryna qatań sógis berilip, kúdiktiler oqyǵan bilim berý uiymdarynyń birqatar basshylary tártiptik jaýapkershilikke tartylǵan.
Qylmystyq is boiynsha sot talqylaýy jalǵasyp jatyr.
