Atyraýda 13 jastaǵy qyzǵa pyshaqpen shabýyl jasap, ony óltirmek bolǵan mektep oqýshysy 15 jylǵa bas bostandyǵynan aiyryldy, dep habarlaidy dalanews.kz.
Oqiǵa 13 naýryzda bolǵan. Toǵyzynshy synyp oqýshysy sabaqqa óz aýysymynan tys ýaqytta kelip, kúzetshige kózildirigin umytyp ketkenin aitqan. Mektep dálizinde ol segizinshi synypta oqityn qyzǵa shabýyl jasap, bes ret pyshaq suqqan. Jaralanǵan oqýshy oblystyq balalar aýrýhanasyna jetkizildi. Dárigerler qyzdyń ómirin saqtap qaldy.
Anasynyń sózinshe, uly eki jyl boiy synyptastarynyń mazaǵyna qalǵan. Oqýshylar ony syrt kelbetine bailanysty da kelemejdegen.
Sot otyrysynda da býlling máselesi kóterildi. Jasóspirimniń buǵan deiin mektep psihologyna baryp, ózine kórsetilgen qysymǵa shaǵymdanǵany anyqtaldy. Alaida oǵan qatysty fizikalyq zorlyq-zombylyq jasalǵany týraly málimet rastalmady.
Sot-psihiatriialyq saraptama jasóspirimdi aqyl-esi durys dep tanydy. Sarapshylardyń qorytyndysy boiynsha, ol óz áreketiniń mánin túsingen jáne ony basqara alǵan.
Sotta shabýyl aiaq astynan jasalmaǵany anyqtaldy. Jasóspirim qylmysqa birneshe kún boiy daiyndalǵan. Sondai-aq shabýyl jasaǵan oqýshy men zardap shekken qyzdyń buǵan deiin tanys bolmaǵany jáne arasynda eshqandai jeke janjal bolmaǵany belgili boldy. Is alqabilerdiń qatysýymen qaraldy.
Zarema Hamidýllina tóraǵalyq etken sot jasóspirimdi adam óltirýge oqtalǵany úshin kináli dep tanyp, 15 jylǵa bas bostandyǵynan aiyrdy. Ol jazasyn kámeletke tolmaǵandarǵa arnalǵan ortasha qaýipsizdik mekemesinde óteidi.
Sot úkimi ázirge zańdy kúshine engen joq. Oǵan apelliatsiialyq shaǵym túsirýge bolady.
