Astanada birneshe ret alaiaqtyq jasady degen kúdikke ilingen 30 jastaǵy er adam ustaldy, dep habarlaidy Dalanews.kz.
Elorda politsiiasy departamentiniń málimetinshe, tergeý materialdary kúdiktiniń keminde 20 alaiaqtyq epizodyna qatysy bolýy múmkin ekenin kórsetken. Tergeý barysynda onyń tanystarynyń senimine kirip, "aqshańyzdy investitsiialap, kóbeitip beremin" dep ýáde bergeni anyqtalǵan.
Alǵashynda ol bir-eki ret azdaǵan somany qaitaryp, ózin senimdi adam retinde kórsetken. Osylaisha jábirlenýshilerdiń senimine ábden kirgennen keiin, olardan iri kólemde aqsha alyp, qarajatty jeke basynyń qajetine jumsaǵan.
Saldarynan azamattar qomaqty qarjysynan aiyrylǵan. Politseilerdiń aitýynsha, jábirlenýshilerdiń birine keltirilgen shyǵyn kólemi 2,25 mln teńgeni quraǵan.
Qazirgi ýaqytta kúdikti qamaýǵa alyndy. Tártip saqshylary onyń basqa da qylmystarǵa qatysy bar-joǵyn tekserip jatyr.
