QR Energetika ministri Erlan Aqkenjenovtyń suhbatyndaǵy «Qazaqstan OPEK+ kelisimi aiasyndaǵy kvota máselesinde óziniń ulttyq múddesin joǵary qoiady» degen málimdemeden keiin, OPEK karteli Qazaqstannyń munai óndirýdi baiaýlatý boiynsha Chevron, Agip, Shell, Eni syndy halyqaralyq alpaýyttarmen kelise almaǵanyn túsindi. Osy aidyń basynda Qazaqstannyń shekteý kvotalaryn saqtamaǵany biraz áńgimege ulasqan bolatyn, dep habarlaidy Dalanews.kz.
«OPEK+ kelisiminiń aldaǵy monitoringtik otyrysy kelesi aptada, 5 mamyr kúni ótedi. Birshama elder Qazaqstannyń kvota saqtamaǵanyn alǵa tartyp, qatań shara qoldanýdy suramaq. Qazaqstan úshin kelisimniń ózi tarap ketip, barlyq elder munai óndirisin kúrt arttyrady degen stsenariidi joqqa shyǵarmaimyz. Nemese Qazaqstandy kelisimnen shyǵaryp tastaý boiynsha sheshim daýysqa salynatyn bolady», - deidi, úkimetke jaqyn DALA INSIDE derekkózi.
OPEK+ qandai shekteý qoisa da, Qazaqstan munai óndirisin kvotaǵa sai shektei almaidy. Sebebi bizde eń kóp munai óndiretin TShO (Teńiz kesheni), NCOC (Qashaǵan), KPO (Qarashyǵanaq) birlesken kásiporyndary Qazaqstanǵa baǵynbaidy.
OPEK ótken naýryz aiyna Qazaqstanǵa táýligine 1,473 million barrel munai óndirý kvotasyn bekitken bolatyn. Qazaqstan ony saqtai almai, táýligine 1,82 million barrel óndirdi. Onyń aldyndaǵy ailarda da kvotadan asyp ketip júrdik. Endi onyń barlyǵyn ótemaqylyq jospar boiynsha retke keltirý úshin, keibir kenishterdegi munaidy múlde qysyp tastaýǵa týra keledi. Al ol tehnologiialyq jaǵynan múmkin emes. Sebebi, tehnogendik apat bolyp, tipti ondai kenishti múlde jaýyp tastaý yqtimaldyǵy joǵary. OPEK úshin osynsha materialdy-tehnikalyq qurbandyqqa barý topastyq bolar edi.
«OPEK+ bizdiń aiaǵymyzdy jippen bailap otyr deýge bolady. Bizge bul uiymnyń paidasy kóp pe, álde ziiany kóp pe, osyny áli anyqtai almadyq. Munai baǵasynyń tym quldyrap ketpeýine sebep bolyp otyrǵandyqtan ǵana olarmen sypaiy bolyp keldik. Neshe túrli ádispen ýaqyt sozyp júrgenbiz. Biraq olar da aqymaq emes. Endi bizge mundai múmkindik bermeidi», - deidi, derekkóz.
Bir sózben aitqanda, kelesi aptada Qazaqstannyń OPEK kartelimen romany aiaqtalýy múmkin. Biraq odan keiin munai fiýchersteriniń baǵasy taǵy da quldyraidy degen qaýip bar. Elimiz sońyna deiin diplomatiialyq ádisterin qoldanyp kóredi.
