Búgin túnde elorda turǵyndaryn alańdatqan tótenshe jaǵdaı oryn aldy. Saǵat túngi 4 shamasynda Astananyń sol jaǵalaýyndaǵy kópqabatty turǵyn úıdiń birinshi qabatynda ornalasqan "Karima" dámhanasynda órt shyqty, dep habarlaıdy Dalanews.kz.
Oqıǵa orny- Dostyq pen Aqmeshit kósheleriniń qıylysyndaǵy segiz qabatty turǵyn úı. Kýágerlerdiń aıtýynsha, aldymen qatty tarsyl estilip, artynsha qoıý tútin men jalyn dámhanadan kókke kóterilgen. Órt áp-sátte keń aýmaqty sharpyp, búkil úıge qaýip tóndirgen.
Oqıǵa ornyna jedel jetken órt sóndirýshiler qyzyl jalynmen kúresti dereý bastap, úı turǵyndaryn qaýipsiz jerge evakýasıalady. Abyroı bolǵanda, adam shyǵyny joq.
Qazirgi tańda, órttiń shyǵý sebepteri anyqtalýda jáne de arnaıy espertıza jumystary júrgizilýde. Qalalyq ákimdik pen jaýapty organdar oqıǵa saldaryn joıý jumystaryn júrgizip jatyr.
Oqıǵa kezinde zardap shekken turǵyndardyń biri Dalanews.kz tilshisine sol túngi sátterdi eske alyp, óz áserimen bólisti.
"Bári aıaq astynan boldy. Tún ortasynda syrttan tarsyl estildi. Terezeden qarasam, tómennen qoıý tútin shyǵyp jatyr eken. Balalarym shoshyp oıandy. Qatty qorqyp qaldyq. Áıteýir, qutqarýshylar der kezinde kelip, bizdi syrtqa alyp shyqty",- deıdi ol.
Qazirgi ýaqytta órttiń naqty shyǵý sebebi anyqtalyp jatyr. Bul baǵytta mamandar tehnıkalyq saraptama júrgizip jatyr. Qalalyq tótenshe jaǵdaılar departamenti bul oqıǵa boıynsha tergeý bastalǵanyn málimdedi.
Qazaqstan Respýblıkasy Tótenshe jaǵdaılar mınıstrligi azamattarǵa órt kezinde durys áreket etý joldaryn aldyn ala bilip júrýdi usynady. Sebebi, dál sizdiń baısaldy jáne jyldam sheshimińiz óz ómirińizdi ǵana emes, ózgelerdi de aman alyp qalýy múmkin.
Órt kezinde qalaı áreket etý kerek?
Órt- bul árdaıym kútpegen ári qaýipti jaǵdaı. Mundaı sátte adam úreıge boı aldyryp, ne isteý keregin umytyp qalýy múmkin. Tipti bala kezden jadymyzda saqtalyp qalǵan- «112 nómirine qońyraý shalyńyz» degen qarapaıym keńestiń ózi sol sátte esimizden shyǵyp ketýi yqtımal.
Tómende órt shyqqan jaǵdaıda este ustaýǵa tıis qarapaıym, biraq óte mańyzdy keńester usynylady.
- Órttiń alǵashqy belgilerin baıqasańyz nemese tútinniń ıisin sezseńiz:
Birden 112 nómirine habarlasyńyz;
- Elektr qýatyn sóndirip, gazdy óshirińiz.
- Aldymen balalar men qart adamdardyń qaýipsizdigin qamtamasyz etińiz.
Olardy órt oshaǵynan alysqa shyǵaryńyz;
Óıtkeni gaz balondary jarylýy nemese ot tez taralýy múmkin.
- Terezelerdi ashpańyz.
Ashylǵan terezeden keletin ottegi ottyń kúsheıýine sebep bolady.
- Jalyn bir bólmede bolsa- esikti myqtap jabyńyz.
Bul ottyń basqa bólmelerge taralýyn tejeıdi;
Esiktiń sańylaýyn dymqyl shúberekpen bekitińiz- tútin kirmeıdi.
- Tútin basqan bólmede eńkeıip nemese eńbektep qozǵalyńyz.
Óıtkeni tútin men ystyq aýa joǵary kóteriledi;
Tynys joldaryn matamen, múmkindiginshe dymqyl shúberekpen jabyńyz.
- Eger jalynnyń ishinen ótý qajet bolsa:
Sýǵa túsip alyńyz nemese ústińizge dymqyl kórpe jabyńyz;
Demińizdi ishke tartyp, jyldam júgirip ótińiz.
- Eger syrtqa óz betińshe shyǵa almasańyz:
Balkonǵa nemese tereze aldyna shyǵyńyz- bul jerlerden qutqarýshylar sizdi tez tabady;
Aq mata, kórpe nemese kózge túsetin basqa da zat ilip, ózińizdiń qaıda ekenińizdi bildirińiz.
Eń bastysy – sabyr saqtańyz!
Panıka- basty jaý. Órt kezinde ár sekýnd mańyzdy. Qarapaıym erejelerdi este saqtap, olardy aldyn ala jaqyndaryńyzǵa úıretińiz.
