Almaty oblysy Jambyl aýdanyndaǵy áskerı bólimde qaza tapqan sarbazdyń anasy úndeý jasady. Vıdeo áleýmettik jelide tarady, dep habarlaıdy Dalanews.kz.

Qaıǵydan qan jutqan ana quzyrly organdardyń áreketsizdigine narazy.

"Qasym-Jomart Kemeluly Toqaev myrza, armıańyzda ne bolyp jatqanyn bilesiz be? Analar balasyz qalýy kerek pe? Qyrshyn jastar ómirden ozýy kerek pe? Bul ne degen armıa? Sizderdiń qyzmetkerlerińizdiń deńgeıi jerde taptalyp jatyr ǵoı. Nege baqylaýǵa alynbaıdy?! Mınıstr myrzalar, nege munyń bári qaraýsyz qalýy kerek? Analar, balalaryńyzdy áskerge jibermeńizder. Bizdiń kózimiz jetti. Biz senip, "ásker túzeldi, balamyzǵa esh nárse bolmaıdy" dep jiberdik. Balamyzdyń máıitin alyp ketkeli otyrmyz", - deıdi sarbazdyń anasy. 

Aıta keteıik, áskerde taǵy da qaıǵyly jaǵdaı boldy. Almaty oblysy Jambyl aýdany Mátibulaq aýylynda ornalasqan №01098 áskerı bóliminde 19 jastaǵy merzimdi sarbaz Dinmuhamed Shynarbek óli tabyldy. 

Marqumnyń ápkesiniń sózinshe, 2024 jyly kúzde áskerge Danıal Shynarbek shaqyrylsa, kóktemde onyń egizi Dinmuhammed ásker qataryna alynǵan. Ekeýi de Otar garnızonynda qyzmet etken.

Otbasyna marqum sýısıd jasady degen habar jetken, alaıda týǵan-týystary bul nusqaǵa senbeıdi.