Abai atyndaǵy ádebiet pen óner salasyndaǵy memlekettik syilyqty berý tártibi men erejesine úlken ózgeris engiziledi. Bul týraly 2026 jylǵy memlekettik syilyqty berý jónindegi komissiianyń tóraǵasy Erlan Qarin málimdedi, dep habarlaidy dalanews.kz.
Onyń aitýynsha, biyl konkýrsqa usynylǵan týyndylardyń eshqaisysy komissiia músheleriniń aiqyn basym daýysyna ie bola almaǵan.
«Konkýrsqa túsken úmitkerlerdiń barlyǵyn syilaimyz, qurmetteimiz. Olar tól rýhaniiattyń damýyna úlken úles qosyp kele jatqan belgili tulǵalar. Ózim de birqataryn jeke tanimyn. Biraq Memlekettik syilyq – tulǵaǵa emes, týyndyǵa beriletin syilyq. Osynyń arajigin ajyratyp alǵan durys», – dedi Erlan Qarin.
Ol ataq belgili bir tulǵanyń bedeline nemese renjip qalmaýyna bailanysty berilmeýi keregin atap ótti.
«Ataqty bireýge unaý nemese jaǵý úshin, renjip qalmasyn degen sebeppen beretin bolsaq, óner odan damymaidy, bul ataqtyń mártebesi artpaidy», – dedi komissiia tóraǵasy.
Sondai-aq Erlan Qarin konkýrs nátijesin durys qabyldaý qajettigin aitty. Onyń sózinshe, usynylǵan týyndylardyń barlyǵy daýysqa salynǵanymen, olardyń eshqaisysy komissiia músheleriniń aiqyn basym qoldaýyna ie bolmaǵan. Kerisinshe, jumystardy qoldamaǵandar men qalys qalǵandardyń úlesi basym bolǵan.
Osy oraida ol 2023 jyly gýmanitarlyq ǵylymdar salasyndaǵy Ahmet Baitursynuly atyndaǵy memlekettik syilyq laiyqty jumystardyń bolmaýyna bailanysty berilmegenin eske saldy.
«Sondyqtan konkýrs bolǵasyn onyń nátijesi de ártúrli bolýy múmkin, ony durys qabyldaý kerek», – dedi ol.
Komissiia tóraǵasy otyrys sońynda Abai atyndaǵy memlekettik syilyqqa tutastai reforma qajet ekeni aitylǵanyn jetkizdi. Onyń pikirinshe, qazirgi syilyqty berý tártibi zaman talabyna sai kelmeidi. Sondyqtan tek talaptary men erejesin ǵana emes, onyń mazmuny men sipatyn da ózgertý qajet.
Erlan Qarin álemdegi eń bedeldi Nobel syilyǵyn mysalǵa keltirip, onyń belgili bir jasqa tolǵany úshin emes, jańalyq pen jańashyldyq úshin beriletinin atap ótti.
«Sol siiaqty Abai atyndaǵy memlekettik syilyqty mereitoi iesine, úmitkerdiń materialdyq jaǵdaiyna jáne basqadai sebepterge bailanysty usyný jalpy durys emes. Sondyqtan, memlekettik syilyq tártibi men erejesine úlken ózgeris engizemiz», – dedi Erlan Qarin.
Sonymen qatar ol 2000 jyldardan beri Abai atyndaǵy memlekettik syilyqtyń 60-qa jýyq adamǵa berilgenin aitty. Onyń sózinshe, bul – shyǵarmashylyq salanyń ókilderine memleket tarapynan kórsetilgen úlken qoldaý. Buǵan qosa, Prezident Qasym-Jomart Toqaevtyń sheshimimen memlekettik syilyq iegerlerine beriletin qarajat kólemi artqan. Osyǵan bailanysty Erlan Qarin bedeldi syilyqqa usynylatyn týyndylar da soǵan laiyq bolýy keregin atap ótti.
«Demek, bedeldi syilyqqa usynylatyn týyndylar da osyǵan laiyq bolýy shart», – dep túiindedi ol.
