Ózbekstan quramasynda óner kórsetken boksshy Saiat Iliiasov Qazaqstan azamattyǵyn rásimdei almai júrgenin málimdedi. Sonyń saldarynan sportshy Tarazda ótip jatqan el chempionatyna qatysa almaǵan, dep habarlaidy dalanews.kz sportbugin.kz-ke silteme jasap.
Boksshynyń aitýynsha, ol biyl qańtarda Qazaqstanǵa qonys aýdaryp, azamattyq alýǵa qajetti qujattaryn tapsyrǵan. Qazir Mańǵystaý oblysynyń namysyn qorǵap júrgen sportshy rásimniń uzaqqa sozylýyna bailanysty birneshe mańyzdy jarystan shet qalǵan.
"Qujattarymdy qańtar aiynda tapsyrdym. Alaida áli kúnge deiin daiyn emes. Ártúrli sebep aitylyp, rásim keiinge shegerilip keledi. Sonyń saldarynan daiyndyǵym zaia ketip jatyr. Qazaqstan chempionatyna da, Aziia chempionatyna da qatysa almadym", – dedi Saiat Iliiasov.
Saiat Iliiasov buǵan deiin Ózbekstan quramasynyń sapynda halyqaralyq jarystarǵa qatysqan. Ol 2022 jyly jastar arasyndaǵy Aziia chempionatynda qola júlde ielengen. Al 2025 jyly 22 jasqa deiingi boksshylar arasyndaǵy Aziia birinshiliginde top jaryp, chempion atandy. 60 keli salmaqta ótken finalda qazaqstandyq Ilia Kalinindi jeńgen.
Qazaqstan atynan óner kórsetý maqsatymen elge qonys aýdarǵan boksshynyń azamattyq ala almai júrgeni áleýmettik jelide de qyzý talqylanyp jatyr.
