Ózbekstanda 27 millionnan astam azamattyń jeke deregi taralǵan bolýy múmkin. BUTTERFLY hakerlik toby eldiń Personalizatsiia agenttiginiń derekter bazasyn buzyp, milliondaǵan adamnyń málimetine qol jetkizgenin málimdedi. Alaida kibershabýyl men aqparattyń taralǵany ázirge táýelsiz túrde rastalǵan joq, dep habarlaidy dalanews.kz.
Pivot basylymynyń málimetinshe, derekter bazasynda azamattardyń pasport málimetteri, telefon nómirleri, turǵylyqty mekenjailary jáne biometriialyq fotosýretteri bolýy múmkin. Sonymen qatar top Ózbekstannyń tsifrlyq tehnologiialar ministri Sherzod Shermatovtyń jeke derekterin jariialaǵanyn málimdegen. Pasport derekteri men biometriialyq aqparattyń taralýy uzaq merzimdi qaýip tóndiredi. Sebebi mundai málimetterdi parol siiaqty ońai aýystyrý múmkin emes, dep jazady basylym.
Alaiaqtar azamattardyń naqty jeke derekterin paidalanyp, bank nemese memlekettik organ qyzmetkeri retinde habarlasýy múmkin. Sondai-aq olar SMS-kodtar men aqsha aldap alý nemese ózge adamnyń atynan tsifrlyq servisterde tirkelý úshin paidalanýy yqtimal.
Basylymnyń málimetinshe, bul Ózbekstannyń memlekettik aqparattyq júielerine qatysty alǵashqy kibershabýyl týraly habar emes. 2026 jylǵy aqpanda Sherzod Shermatov 27-30 qańtar aralyǵynda úsh memlekettik organnyń aqparattyq júiesine kibershabýyl jasalǵanyn habarlaǵan.
Alǵashynda 15 million azamattyń deregi taralǵany aitylǵanymen, keiin buzylǵan jazbalar sany shamamen 60 myń dep baǵalanǵan. Degenmen bul oqiǵanyń BUTTERFLY tobynyń qazirgi málimdemesimen bailanysy bar ekenine qatysty derek joq.
Jańa kibershabýylǵa bailanysty Ózbekstannyń memlekettik organdary ázirge resmi túsinikteme bergen joq. Oqiǵanyń mán-jaiyn anyqtaý úshin memlekettik organdardyń málimdemesi men tehnikalyq tekserý nátijeleri qajet.
Pivot basylymy azamattarǵa kúmándi siltemelerge ótpeýge, SMS-kodtardy, parolder men jeke málimetterdi bógde adamdarǵa bermeýge keńes beredi.
Aita keteiik, biyl aqpanda 15 million ózbekstandyqtyń jeke deregi tarady degen habar taraǵan edi. Alaida artynsha Ózbekstan biligi bul aqparattyń rastalmaǵanyn málimdedi.
