Өзбекстанда 27 миллионнан астам азаматтың жеке дерегі таралған болуы мүмкін. BUTTERFLY хакерлік тобы елдің Персонализация агенттігінің деректер базасын бұзып, миллиондаған адамның мәліметіне қол жеткізгенін мәлімдеді. Алайда кибершабуыл мен ақпараттың таралғаны әзірге тәуелсіз түрде расталған жоқ, деп хабарлайды dalanews.kz.
Pivot басылымының мәліметінше, деректер базасында азаматтардың паспорт мәліметтері, телефон нөмірлері, тұрғылықты мекенжайлары және биометриялық фотосуреттері болуы мүмкін. Сонымен қатар топ Өзбекстанның цифрлық технологиялар министрі Шерзод Шерматовтың жеке деректерін жариялағанын мәлімдеген. Паспорт деректері мен биометриялық ақпараттың таралуы ұзақ мерзімді қауіп төндіреді. Себебі мұндай мәліметтерді пароль сияқты оңай ауыстыру мүмкін емес, деп жазады басылым.
Алаяқтар азаматтардың нақты жеке деректерін пайдаланып, банк немесе мемлекеттік орган қызметкері ретінде хабарласуы мүмкін. Сондай-ақ олар SMS-кодтар мен ақша алдап алу немесе өзге адамның атынан цифрлық сервистерде тіркелу үшін пайдалануы ықтимал.
Басылымның мәліметінше, бұл Өзбекстанның мемлекеттік ақпараттық жүйелеріне қатысты алғашқы кибершабуыл туралы хабар емес. 2026 жылғы ақпанда Шерзод Шерматов 27-30 қаңтар аралығында үш мемлекеттік органның ақпараттық жүйесіне кибершабуыл жасалғанын хабарлаған.
Алғашында 15 миллион азаматтың дерегі таралғаны айтылғанымен, кейін бұзылған жазбалар саны шамамен 60 мың деп бағаланған. Дегенмен бұл оқиғаның BUTTERFLY тобының қазіргі мәлімдемесімен байланысы бар екеніне қатысты дерек жоқ.
Жаңа кибершабуылға байланысты Өзбекстанның мемлекеттік органдары әзірге ресми түсініктеме берген жоқ. Оқиғаның мән-жайын анықтау үшін мемлекеттік органдардың мәлімдемесі мен техникалық тексеру нәтижелері қажет.
Pivot басылымы азаматтарға күмәнді сілтемелерге өтпеуге, SMS-кодтарды, парольдер мен жеке мәліметтерді бөгде адамдарға бермеуге кеңес береді.
Айта кетейік, биыл ақпанда 15 миллион өзбекстандықтың жеке дерегі тарады деген хабар тараған еді. Алайда артынша Өзбекстан билігі бұл ақпараттың расталмағанын мәлімдеді.
