Búgin Astanada Beibitshilik jáne kelisim saiabaǵy ashyldy. Bul – Álemdik jáne dástúrli dinder kóshbasshylarynyń sezi aiasynda dinaralyq jáne mádenietaralyq dialogty nyǵaitý maqsatymen qolǵa alynǵan biregei bastama. Saltanatty is-sharaǵa VIII Sezd delegattarymen birge Qazaqstan Parlamenti Senatynyń Tóraǵasy, Álemdik jáne dástúrli dinder kóshbasshylary sezi Hatshylyǵynyń basshysy Máýlen Áshimbaev qatysty, dep habarlaidy Dalanews.kz.
Hatshylyq basshysy mártebeli meimandarǵa iltipat bildire kelip, Beibitshilik jáne kelisim saiabaǵynyń negizin 2022 jyly Álemdik jáne dástúrli dinder kóshbasshylarynyń VII sezine qatysýshylar qalaǵanyn aitty. Atalǵan is-sharaǵa Rim Papasy Frantsisk, Ál-Azhardyń Joǵarǵy imamy sheih Ahmed at-Taieb qatysqan bolatyn. Osy aralyqta saiabaq Qazaqstandaǵy túrli konfessiialar arasyndaǵy dostyq pen birliktiń jarqyn úlgisine ainaldy.
«Sezge qatysýshylardyń izgi bastamasynyń nátijesinde Esil ózeniniń jaǵalaýynda jańa saiabaq boi kóterdi. Bul – birliktiń, ózara senimniń jáne beibitshilik pen kelisimniń jarqyn simvoly. Barlyq halyqtyń dástúrinde tal ómirsheńdikti, ósýdi jáne órkendeýdi bildiredi. Sondyqtan bul saiabaqty senim men etnosqa qaramastan kemel keleshekke ortaq umtylysymyzdyń belgisi dep qabyldaimyz. Qazaqstan astanasynyń ortasynda ornalasqan Beibitshilik jáne kelisim saiabaǵy dinder men mádenietter arasyndaǵy rýhani kópir bolady dep senemiz. Mundai qadam qazirgidei kúrdeli kezeńde airyqsha mańyzǵa ie», – dep, Álemdik jáne dástúrli dinder kóshbasshylary Sezi Hatshylyǵynyń basshysy saiabaqtyń ashylýyna óz úlesin qosqan barlyq qatysýshy men niettesterge alǵys bildirdi.
Sonymen qatar Máýlen Áshimbaev óz sózinde Qazaqstan túrli ult, mádeniet jáne din ókilderi beibit qatar ómir súrip jatqan biregei el ekenin atap ótti. Bul etnosyna jáne dinine qaramastan barshaǵa ashyqtyq, senim, tózimdilik, qurmet siiaqty qundylyqtardyń naqty kórinisi ekeni anyq. Beibitshilik pen kelisim saiabaǵynyń dál ortasyndaǵy «Ómir aǵashy» monýmenti de osy rýhani ustanymdy beineleidi. Úsh jyl buryn munda delegattar 60-tan astam tal otyrǵyzǵan edi. Monýmenttiń ortasyna kúmbez úlgisinde emen aǵashy otyrǵyzylyp, sýburqaq ornatylǵanyn da atap ótken jón.
Joba avtorlarynyń aitýynsha, sý men tamyry tarih tereńine boilaǵan ómir aǵashy Jerdegi máńgilik tirshilikti jáne onyń qundylyǵyn dáripteidi. Sol arqyly atalǵan installiatsiia, senimi men nanymyna qaramastan, planetadaǵy barlyq adamdy kelisimge, beibitshilik pen dostyqqa shaqyrady. Kúmbez bir aspan astyndaǵy beibitshilikti, al, 4 jaǵyndaǵy kireberis dúnieniń tórt buryshy: Ońtústik, Soltústik, Batys jáne Shyǵysty bildiredi. Kúmbezdiń qabyrǵalarynda dúnieniń jaratylysy, Qazaqstan úshin tarihi mańyzy bar oqiǵalar jáne ejelgi sýretter – petroglifter beinelengen.
Saiabaqtyń ashylýyna qatysqan VIII Sezd delegattary «Bala boiaýyndaǵy álem» atty sýret kórmesin tamashalady. Onda respýblikalyq jas sýretshiler baiqaýynyń jeńimpazdary men júldegerleriniń qylqalamynan týǵan úzdik 20 kartina qoiylǵan kópshilik nazaryna usynylǵan. Atalǵan ekspozitsiialar jas býynnyń shyǵarmashylyǵymen tanysýǵa múmkindik berip, jarqyn jáne úilesimdi bolashaqqa degen senimdi nyǵaitýǵa óz úlesin qospaq.
