Máskeý 9 mamyrǵa daiyndalyp jatyr. Biraq biylǵy daiyndyqtyń atmosferasy burynǵydai saltanatty emes. Qalada áskeri paradqa qaraǵanda qaýipsizdik máselesi kóbirek talqylanyp jatyr. Resei biliginiń Jeńis kúni mobildi internetti ýaqytsha óshirý týraly sheshimi sonyń aiqyn belgisine ainaldy, dep habarlaidy dalanews.kz.
DW málimetinshe, Sońǵy jyldary Máskeý úshin 9 mamyr tek mereke emes, Kremldiń saiasi simvolyna ainalǵan edi. Qyzyl alańdaǵy tankter, áskeri tehnika, ushaqtar jáne aýqymdy parad Reseidiń kúshin kórsetetin negizgi quraldardyń biri boldy. Alaida Ýkrainamen soǵys bastalǵaly bul kúnniń reńki ózgere bastady. Ásirese ýkrain drondarynyń Resei aýmaǵyna, onyń ishinde Máskeý mańyna deiin jetýi biliktiń qaýipsizdikke degen kózqarasyn qataityp jiberdi.
Sol sebepti biyl Máskeýde mobildi internet pen bailanys qyzmetterine shekteý qoiylmaq. Resmi túsindirý boiynsha, bul – qaýipsizdik sharasy. Bilik dron shabýyldary kezinde bailanys arnalary túrli maqsatta paidalanylýy múmkin dep esepteidi. Biraq bul sheshimniń qoǵamǵa áseri áldeqaida tereń.
Óitkeni qazirgi Máskeý – internetke tolyq táýeldi megapolis. Taksi qyzmeti, jetkizý servisteri, bank operatsiialary, navigatsiia, messendjerler – bári mobildi jelige bailanǵan. Internet óshken sátte úlken qalanyń kúndelikti yrǵaǵy da buzylady. Iaǵni másele birneshe saǵattyq qolaisyzdyqta emes. Bul – soǵystyń endi maidan dalasynda ǵana emes, qarapaiym adamdardyń turmysynda da sezile bastaǵanynyń kórinisi.
Bir qyzyǵy, biylǵy paradtyń ózi de burynǵydai ótpeýi múmkin degen aqparat tarady. Kei málimetter boiynsha, aýyr áskeri tehnikanyń kólemi azaiýy yqtimal. Bul da kezdeisoq emes. Sebebi qaýipsizdik táýekeli kúsheigen saiyn, paradtyń ózi qorǵanys operatsiiasyna uqsap barady.
Sońǵy úsh jylda Reseide “qaýipsizdik” uǵymy erekshe saiasi quralǵa ainaldy. Internetke baqylaý kúsheidi, VPN servisterine qysym artty, áleýmettik jeliler shektele bastady. Al endi áskeri qaýip faktorlary bul protsesti odan ári jedeldetip otyr. Kreml úshin aqparattyq keńistikti baqylaý – qazir áskeri turaqtylyqtyń bir bóligine ainalǵandai.
Mundai jaǵdaida eń úlken ózgeris adamdardyń psihologiiasynda baiqalady. Buryn 9 mamyr Resei qoǵamyna “biz jeńgen halyqpyz” degen sezim berse, búginde ol kún “qaýip bar, saq bolý kerek” degen atmosferamen qatar kele bastady. Bul – simvoldyq ózgeris. Óitkeni memleketterdiń kóńil kúii kóbine osyndai detaldardan baiqalady.
