Prezident memlekettik marapat jáne áskeri shen tapsyrý rásiminde sóz sóiledi, dep habarlaidy dalanews.kz.
Memleket basshysy – Qazaqstan Qarýly Kúshteri Joǵarǵy Bas Qolbasshysy Qasym-Jomart Toqaev sardarlar men sarbazdardy, jiynǵa qatysýshylardy Otan qorǵaýshy kúnimen jáne Jeńis kúnimen quttyqtady.
"Qos merekeniń mán-mazmuny – úndes, taǵylymy – ortaq. Osy meiramdarda elimizdiń erlik dástúri keńinen dáripteledi. Biz bul kúnderi jurtymyzǵa qorǵan bolyp júrgen erlerge qurmet kórsetemiz. Sondai-aq surapyl soǵysta Otan úshin ot keshken batyrlardyń rýhyna taǵzym etemiz. Qazaq – shekarasyn aq naizanyń ushymen, aq bilektiń kúshimen bekemdegen qaharman halyq, erjúrek ult. Batyr babalarymyz el taǵdyry synǵa túsken sátte bir Týdyń astyna jinalǵan. Birligin nyǵaityp, jurtyn jaýdan qorǵaǵan. Baitaq dalany kózdiń qarashyǵyndai saqtap, urpaqqa amanat etken. Osy amanatqa adal bolý – bizdiń qasterli boryshymyz. Birtutas Qazaqstan halqy muny jaqsy túsinedi. Naýryz aiyndaǵy konstitýtsiialyq reforma – sonyń aiqyn dáleli. Saiasi naýqan kezinde biz eń aldymen óskeleń urpaq aldyndaǵy jaýapkershilikti tereń sezine otyryp, tarihi tańdaýymyzdy jasadyq. Bárimiz bir el bolyp, jańa Konstitýtsiiany qabyldadyq. Muny ult bolashaǵyna tikelei yqpal etetin asa mańyzdy sheshim desek, qate bolmaidy", – dedi Prezident.
Qasym-Jomart Toqaev Konstitýtsiia memlekettigimiz ben egemendigimizdiń myzǵymas kepili ekenin atap ótti.
"Bas qujatta halqymyzdyń múddesi, maqsat-muraty men biregei qundylyqtary kórinis tapty. Jańa Ata zańda Egemendik pen Táýelsizdikti qorǵaý, azamattardyń quqyqtary men bostandyqtaryn saqtaý, halqymyzdyń ál-aýqatyn arttyrý, birligin kúsheitý buljymas qaǵidat retinde aiqyndaldy. Adam kapitalyn, bilim-ǵylymdy, innovatsiiany damytý memleket qyzmetiniń strategiialyq baǵyty retinde bekitildi. Osylaisha, biz Zań men tártip ústemdik quratyn, barshaǵa birdei múmkindik beriletin, Ádiletti, Qýatty, Órkenietti memleket qurý jolyna bet aldyq. Qazaqstannyń maqsaty – biik, baǵdary – aiqyn. Yrysty yntymaǵymyzdy jáne berekeli birligimizdi saqtai bilsek, osy muratymyzǵa jetemiz", – dedi Memleket basshysy.
