Astanada M. Áýezov atyndaǵy Ortalyq qalalyq kitaphanasynda Jeńis kúni men Otan qorǵaýshylar kúnine orai «Máńgi óshpes uly erlik» taqyrybynda patriottyq kezdesý ótti, dep habarlaidy dalanews.kz.
Is-sharany Astana qalasy Ortalyqtandyrylǵan kitaphanalar júiesine qarasty kitaphana ujymy uiymdastyrdy. Kezdesýge general-leitenant, tarih ǵylymdarynyń doktory, professor, Qazaqstan Respýblikasy Ulttyq jaratylystaný ǵylymdary akademiiasynyń akademigi Abai Tasbolatov qatysyp, jastarmen mazmundy suhbat qurdy.
Jiynǵa Ulttyq ulannyń 6636 áskeri bóliminiń sarbazdary men «Turan» kolledjiniń stýdentteri qatysyp, belsendilik tanytty.
Kezdesýdiń negizgi maqsaty – jastar arasynda otansúigishtik qundylyqtardy dáripteý, Jeńis kúni men Otan qorǵaýshylar kúniniń tarihi mańyzyn nasihattaý, jas urpaqtyń el tarihyna qyzyǵýshylyǵyn arttyrý jáne erlik pen azamattyq jaýapkershiliktiń mánin túsindirý boldy.
Is-shara barysynda «Máńgi óshpes uly erlik» taqyrybyndaǵy kitap kórmesi tanystyrylyp, merekelik beinebaian kórsetildi. Sonymen qatar kesh qonaǵymen suhbat uiymdastyrylyp, qatysýshylar ózderin tolǵandyrǵan suraqtaryn qoidy.
Kezdesý barysynda Abai Tasbolatov táýelsizdiktiń alǵashqy jyldaryndaǵy Qarýly kúshterdiń qalyptasý kezeńi týraly estelikterimen bólisti. Ol áskeri kadr tapshylyǵy, sol kezeńdegi áleýmettik-ekonomikalyq qiyndyqtar jáne áskeri bilim berý júiesin qalyptastyrý jolyndaǵy eńbekter týraly aityp ótti.
«Patriottyq tárbie – ózdiginen qalyptaspaidy. «Men Otandy súiemin» dep aitý ǵana jetkiliksiz. Onyń naqty isi, jaýapkershiligi bolýy kerek. Sonyń bir mańyzdy baǵyty – tarihty bilý. Ótkendi de, búgindi de tereń túsiný qajet. Biz kópultty memleketpiz, bizdiń kúshimiz – birligimizde», – dedi spiker.
Sonymen qatar ol jastardy el tarihyn qurmetteýge, bilim alýǵa, tártipti bolýǵa jáne Otanǵa adal qyzmet etýge shaqyrdy.
