Qazaqstanda 16 qyrkúiekten bastap qylmystyq zańnamada azamattardyń quqyqtary men bostandyqtaryn qorǵaýdy kúsheitýge baǵyttalǵan ózgerister kúshine enedi,- dep habarlaidy Dalanews.kz
"Keibir zańnamalyq aktilerge Qazaqstan Respýblikasynyń qylmystyq zańnamasyn ońtailandyrý máseleleri boiynsha ózgerister men tolyqtyrýlar engizý týraly" Zańda adam urlaý jáne nekege májbúrleý siiaqty ózekti taqyryptarǵa qatysty ózgerister qarastyrylǵan.
Basty jańashyldyqtardyń biri — Qylmystyq kodekstiń 125-babyndaǵy eskertpeniń alynyp tastalýy. Buǵan deiin urlanǵan adamdy erikti túrde jibergen adam qylmystyq jaýapkershilikten bosatylýy múmkin edi. Endi bul múmkindik alynyp tastaldy: jábirlenýshini óz erkimen bosatqan kúnniń ózinde kináli adam zańǵa sáikes jaýapkershilikke tartylady.
Sonymen qatar Qylmystyq kodekske jańa 125-1-baby "Nekege májbúrleý" engizildi.
"Endi bul áreket qylmystyq quqyqbuzýshylyq retinde tanylady. Nekege májbúrlegeni úshin aiyppul, túzeý nemese qoǵamdyq jumystar, bas bostandyǵyn shekteý nemese bas bostandyǵynan aiyrý túrindegi jaza qarastyrylǵan", - delingen IIM habarlamasynda.
Qylmystyń mán-jaiyna bailanysty 2000 ailyq eseptik kórsetkishke deiingi mólsherde aiyppuldan bastap eki jylǵa deiingi merzimge bas bostandyǵynan aiyrýǵa deiin jaza qarastyrylady. Eger mundai áreket abaisyzda aýyr zardaptarǵa ákelse, bes jyldan on jylǵa deiin bas bostandyǵynan aiyrý jazasy kózdeledi. Al eger májbúrleý zorlyq-zombylyqpen, kámeletke tolmaǵandarǵa qatysty, táýeldiligin paidalaný arqyly, adamdar tobymen nemese qyzmet babyn paidalana otyryp jasalsa, budan da qatań jaza qarastyrylǵan.
Bul ózgerister nekege májbúrleýdiń aldyn alýǵa jáne eń aldymen áielder men jasóspirimder siiaqty osal toptardy qorǵaýǵa baǵyttalǵan.
