Briýsselde Memleket basshysy Qasym-Jomart Toqaevtyń, Eýropalyq keńes Prezidenti Antoniý Koshtanyń jáne Eýropalyq komissiia Prezidenti Ýrsýla fon der Liaienniń qatysýymen ekijaqty mańyzdy qujattar paketine qol qoiý rásimi ótti. Bekitilgen kelisimder otandyq aviatsiia men kólik infrakurylymyn aýqymdy jańǵyrtýǵa, jol sektoryn tsifrlandyrýǵa, sondai-aq elimizdiń ónerkásiptik áleýetin arttyrýǵa baǵyttalǵan, dep habarlaidy Dalanews.kz.
Qujattar ishindegi eń negizgisi — «Air Astana» aviakompaniiasynyń eýropalyq Airbus kontserninen 50-ge jýyq jańa áýe kemesin satyp alý jónindegi strategiialyq tapsyrysy boldy. Bul kelisim Qazaqstan men Eýroodaq arasyndaǵy áýe qatynasynyń normativtik-quqyqtyq bazasyn nyǵaitatyn «Áýe tasymalynyń keibir aspektileri týraly» úkimetaralyq qujatpen bekitildi. Aviatsiiamen qatar, taraptar Transkaspii halyqaralyq baǵdary boiyndaǵy jerústi logistikasyn damytýǵa da airyqsha mán berdi.
Osy baǵytta Eýropalyq investitsiialyq bank «QazAvtoJol» ulttyq kompaniiasymen osy strategiialyq dálizge kiretin aimaqtyq avtojoldardy qalpyna keltirý jobalaryn qarjylandyrý týraly kelisimge qol qoidy.
Eýropalyq qaita qurý jáne damý bankimen (EQDB) seriktestik te tehnologiialyq jańarýdyń mańyzdy qadamyna ainaldy. Kólik ministrligi men EQDB arasynda intellektýaldy kólik júielerin engizý jáne «E-joldary» tsifrlyq platformasyn iske qosýǵa arnaiy grant bólý jóninde memorandým jasaldy.
Budan bólek, Ónerkásip jáne qurylys ministrligi men EQDB birlesip, Qazaqstanda Mineraldar men metaldar salasyndaǵy ozyq tájiribelik ortalyq qurý úshin tehnikalyq-ekonomikalyq negizdeme (TEN) ázirleýge ýaǵdalasty.
