Shyǵys Qazaqstan oblysynda bank shotyn úshinshi tulǵalarǵa aqyly túrde paidalanýǵa bergen kolledj stýdenti sottaldy, dep habarlaidy dalanews.kz.
Shemonaiha aýdandyq sotynyń málimetinshe, 2025 jyldyń qyrkúieginde stýdent qyz Telegram messendjeri arqyly belgisiz adammen bailanysqa shyǵyp, 6 myń teńge syiaqy úshin óziniń ekinshi deńgeili bankterdiń birindegi shotyna qoljetimdilikti bergen.
Keiin bul shot alaiaqtar tarapynan paidalanylǵan. WhatsApp-taǵy buzylǵan akkaýnt arqyly aldanǵan jábirlenýshi stýdenttiń shotyna 280 myń teńge aýdarǵan.
Sot otyrysynda aiyptalýshy kinásin tolyq moiyndap, shotyn alaiaqtar paidalanatynyn bilmegenin aityp, ókinetinin jetkizdi.
Sot ony Qylmystyq kodekstiń 232-1-babynyń 1-bóligi boiynsha kináli dep tanyp, 20 ailyq eseptik kórsetkish kóleminde, iaǵni 78 640 teńge aiyppul saldy.
Jaza taǵaiyndaý kezinde sot stýdenttiń jas ekenin, buryn sottalmaǵanyn, kinásin moiyndap, shyn júrekten ókingenin jáne oń minezdemesin eskergen.
Sonymen qatar sottalǵan azamattan Jábirlenýshilerge ótemaqy qoryna 19 660 teńge óndirildi.
Sot jábirlenýshiniń keltirilgen materialdyq shyǵyndy óndirý úshin azamattyq talap qoiýǵa quqyǵy bar ekenin túsindirdi.
Úkim zańdy kúshine engen joq.
