Almaty oblysynda qoqys poligonynan shyqqan órt úsh kúnnen beri sóndirilgen joq, dep habarlaidy Dalanews.kz.
Ákimdik aýa sapasy baqylaýda dep sendirip otyr.
Almaty–Qonaev avtojolynyń 35-shaqyrymyndaǵy turmystyq qaldyqtar poligonynda shyqqan órtke bailanysty jaqyn mańdaǵy eldi mekenderde aýa sapasyna sanitarlyq-epidemiologiialyq monitoring júrgizilgen.
15–16 qyrkúiek kúnderi 288 synama alynyp, olardyń bir bóliginde shekti mánnen asyp ketken kórsetkishter anyqtaldy. Osyǵan orai turǵyndarǵa, ásirese balalar men qarttarǵa jáne tynys alý joldarynyń sozylmaly aýrýy bar adamdarǵa aldyn alý sharalaryn saqtaý jóninde nusqaýlyq berildi.
17 qyrkúiekte sol núktelerde júrgizilgen qaita tekserýler normalarǵa sai nátijeler kórsetken.
KTK málimetinshe,qoqys poligonynyń qazirgi jaǵdaiy tipti kúrdelene tústi – aýmaq túgeldei qalyń tútinge oranǵan. Qalada jańbyr jaýǵanymen, tereńdigi on metrden asatyn jer astyndaǵy jalyn áli basylar emes. Kerisinshe, tútin burynǵydan da qoiýlanyp ketti.
Mektepter onlain oqýǵa kóshti
Qaýipsizdik úshin mańaidaǵy úsh mektep dástúrli oqýdan onlain formatqa aýysýǵa májbúr boldy. Órttiń saldary oqýshylardyń da kúndelikti ómirine áser etip otyr.
Ákim oqiǵa ornynda
Jaǵdaidy baqylaýǵa oblys ákimi kelip, arnaiy komissiia quryldy. Saraptama nátijesine qarai tótenshe jaǵdai jariialanýy múmkin ekeni de aityldy.
Órtti sóndirýge júzdegen maman tartyldy
Qyzyl jalyndy aýyzdyqtaý úshin 200-den asa maman men júzge jýyq tehnika jumyldyrylǵan. Keibiri basqa óńirlerden shaqyrylǵan. Alty órt sóndirý alańy jasaqtalyp, mańaidaǵy Tereń-Qara ózeninen úzdiksiz sý tartylyp jatyr.
Órt aýmaǵy
Úsh kún buryn bastalǵan órttiń sebebi ázirge belgisiz. Poligonnyń jalpy kólemi 35 gektar bolsa, sonyń 15 gektary otqa oranǵan.
