Almaty ákimdigi Sanjar Boqaev jariialaǵan videoǵa qatysty túsinikteme berdi, dep habarlaidy Dalanews.kz.
Almaty ákimdigi Úlken Almaty ózeni jaǵalaýyn abattandyryp jatqan «Pavlodarskii rechnoi port» kompaniiasy 15 qyrkúiekte 12 plitanyń «urlanǵanyn» anyqtap, politsiiaǵa aryzdanǵanyn habarlady. Bul derek boiynsha qylmystyq is qozǵalǵan.
Ákimdiktiń málimetinshe, Úlken Almaty kóliniń jaǵalaýynda shytynaǵan jáne zaqymdanǵan plitalar bar. 2024 jyldyń 17 qazandaǵy kelisimge sáikes, olardy jóndeý jumystary bastalǵan.
«Jaramdy elementter Toraiǵyrov pen Sátpaev kóshelerine deiingi aýmaqta qaita qoldanylyp jatyr. Ornyna beton tóselýde. Qazir 2 110 plita alynyp, onyń 1 250-i qaita paidalanyldy. Qalǵany aldaǵy ýaqytta qoldaný úshin qoimaǵa jiberildi. Sondyqtan granit taqtalardyń bólshektelýi – jobada qarastyrylǵan shara, al urlyq deregi bólek qylmystyq is», – delingen ákimdik habarlamasynda.
Eske salaiyq, qoǵam belsendisi Sanjar Boqaev Almatydaǵy Úlken Almaty ózeniniń boiynan tabiǵi granit plitalarynyń zańsyz tasymaly júrip jatqanyn áshkerelegen bolatyn.
Boqaevtyń aitýynsha, jergilikti turǵyndar ózen jaǵasynan túsirilgen beinejazbalardy jiberip, túnde júk kólikterine granit plitalary tielip jatqanyn habarlaǵan. Osydan keiin ol tún ishinde oqiǵa ornyna baryp, kúdikti áreketterdi baqylaǵan.
Belsendi kóliktiń tún ortasynda ǵana júrýin kúdikti jaǵdai dep baǵalady.
Alǵashynda Boqaev plitalardyń qala ákimdiginiń bazasyna jetkizilýi múmkin ekenin topshylaǵan. Óitkeni granit plitalary ákimdiktiń múlki bolyp sanalady. Alaida kólik qala syrtyna bet alǵan.
Qoǵam belsendisi granit tastardy qaitadan qalaǵa aparýdy talap etti.
