Qazaqstan Prezidenti VIII Álemdik jáne dástúrli dinder kóshbasshylary sezinde sóz sóiledi. Ashylý saltanatynda Qasym-Jomart Toqaev dinniń qoǵamdaǵy rólin atap ótip, dini konfessiialar ár dáýirde adamdarǵa túrli qiyndyqtar men synaqtardy eńserýge kómekteskenin aitty, - dep habarlaidy Dalanews.kz
– Eleýli jetistikterge qaramastan, adamzat kóptegen gýmanitarlyq syn-qatermen betpe-bet kelip otyr. Milliondaǵan adamdar ashtyqtan, indetten, qorshaǵan ortanyń azyp-tozýynan jáne klimat ózgerisinen zardap shegýde. Qazaqstan kedeilikti azaitýǵa, ekologiialyq problemalardy sheshýge jáne gýmanitarlyq kómek kórsetýge aitarlyqtai kúsh-jiger jumyldyrady. Bul máselelerdi kelesi jyly sáýir aiynda Astanada ótetin Ekologiia jáne ornyqty damý óńirlik sammitinde talqylaý josparlanǵan. Elimiz – musylman áleminiń qiyr soltústiktegi eń úlken aimaǵy. Otyz jyl buryn biz Islam yntymaqtastyǵy uiymynyń múshesi atandyq. Osy bedeldi birlestik aiasynda Qazaqstan Azyq-túlik qaýipsizdigi jónindegi islam uiymynyń qurylýyna bastamashy boldy. Din qairatkerleri árqashan adamdardy jigerlendirip, igi is jasaýǵa, joq-jitikke járdemdesýge shaqyrady. Dini qaýymdar gýmanitarlyq missiialar men eriktiler baǵdarlamasyn iske qosyp, mektep pen aýrýhana ashady. Jastar men áleýmettik álsiz toptarǵa qamqorlyq kórsetip, klimat pen migratsiia máselesin qozǵaidy. Bul XXI ǵasyrda da dinniń jasampaz kúshke ie ekenin taǵy bir dáleldeidi. Onyń múmkindigin tolyq paidalaný qajet, – dedi Prezident.
Memleket basshysy álem kúrdeli ekologiialyq qaýip-qatermen betpe-bet kelip otyrǵanyn, sonyń ishinde Ortalyq Aziia ony erekshe sezinetinin jetkizdi.
– Klimat ózgerisi munda álemdik deńgeimen salystyrǵanda óte tez júrip jatyr. Aimaqta qurǵaqshylyq jii oryn alyp, muzdyqtar erip, tushy sýdyń qory azaiyp keledi. Kez kelgen halyqtyń rýhani dástúri tabiǵatty aialaýǵa, qorshaǵan ortamen úilesimdi ómir súrýge úiretedi. Óitkeni Jer – Jaratýshy syilaǵan ortaq úiimiz. Oǵan qamqorlyq tanytý – paryzymyz. Klimattaǵy ózgerister men onyń aýyr saldary – tek ǵylymi nemese ekonomikalyq másele emes, irgeli adamgershilik qundylyqtar úshin synaq. Yqtimal ekologiialyq apattardyń aldyn alý úshin halyqaralyq yntymaqty nyǵaitý, sondai-aq jahandyq jáne óńirlik deńgeide úilesimdi áreket etý mańyzdy. Sondyqtan Sezd aiasynda klimat ózgeristerine qarsy kúrestegi din kóshbasshylarynyń róli týraly birlesken qujat ázirleýdi usynamyn. Atalǵan qujatta rýhani dástúrlerge negizdelgen jáne klimat ózgeristerine osal óńirlerdi qoldaýǵa erekshe mán beretin ekologiialyq jaýapkershiliktiń jalpyǵa birdei qaǵidattaryn bekitýge bolady, – dedi Qasym-Jomart Toqaev.
