Jetisý oblysynda 32 jastaǵy áıeldiń qazasyna qatysty polısıa tergeý júrgizip jatyr. Marqumnyń týystary kúdikti onyń kúıeýi ekenin aıtady, dep habarlaıdy Dalanews.kz.
Qaıǵyly oqıǵa týraly alǵashqy aqparat jýrnalıs Sandýǵash Dúısenovanyń paraqshasynda jarıalandy. Oqıǵa Aqsý aýdanyna qarasty Balasaz aýylynda oryn alǵan.
"Kúıeýi ony asa qatygezdikpen óltirgen. Qandy oqıǵa Aızattyń eki jasar qyzynyń kóz aldynda bolǵan. Aldymen olardyń arasynda janjal shyqqan. Keıin birneshe saǵat boıy aıaýsyz azaptaý jalǵasqan. Aızattyń denesinde azaptaýdyń belgisi bolǵan – jabyq bassúıek-mı jaraqaty, mıynyń isinýi, bassúıektiń negiziniń synýy, qol-aıaq pen jambastyń kóptegen synyǵy, denesinde dóreki betkeımen súırelgen izder. Týystary ony arqanmen atqa baılap, dalada súıregen dep boljaıdy", – dep jazdy jýrnalıs.
Týystarynyń sózinshe, marqumnyń denesinde saý jer qalmaǵan.
"Polısıanyń málimetinshe, Aızat Jumanova 22 maýsym kúni túngi saǵat 02:30-da Taldyqorǵan qalalyq aýrýhanasyna jetkizilgen. Jarty saǵattan soń dárigerler onyń qaıtys bolǵanyn rastaǵan. Alaıda týystary buǵan senbeıdi. Olar Aızat sol sátke deıin-aq jan tapsyrǵan dep esepteıdi", – dep jazdy Dúısenova.
Polısıa bul fakti boıynsha QR QK 106-babynyń 3-bóligimen "Abaısyzda ólimge ákep soqqan aýyr dene jaraqatyn keltirý" baby boıynsha qylmystyq is qozǵaǵan. Alaıda týystary bul isti "Asa qatygezdikpen jasalǵan adam óltirý" babyna aýystyrýdy talap etti.
Jetisý oblysy Polısıa departamenti bul derekke baılanysty qylmystyq is qozǵalyp, sotqa deıingi tergeý amaldary júrgizilip jatqanyn habarlady.
"Kúdikti ustalyp, ýaqytsha ustaý ızolátoryna qamaldy. Qylmystyń tolyq jáne obektıvti mán-jaıyn anyqtaý maqsatynda barlyq qajetti tergeý amaldary júrgizilýde. Aıǵaqtar jınalyp, saraptamalar taǵaıyndaldy. Barlyq taraptyń ýájderi tekserilip jatyr. Tergeý zań aıasynda, proseske qatysýshylardyń quqyqtary men zańdy múddeleri qatań saqtala otyryp júrgizilýde. Kináliler zańǵa saı jazaǵa tartylady. Tergeý múddesine baılanysty basqa aqparat jarıalanbaıdy", – delingen polısıa málimdemesinde.
