Jetisý oblysynda 32 jastaǵy áieldiń qazasyna qatysty politsiia tergeý júrgizip jatyr. Marqumnyń týystary kúdikti onyń kúieýi ekenin aitady, dep habarlaidy Dalanews.kz.
Qaiǵyly oqiǵa týraly alǵashqy aqparat jýrnalist Sandýǵash Dúisenovanyń paraqshasynda jariialandy. Oqiǵa Aqsý aýdanyna qarasty Balasaz aýylynda oryn alǵan.
"Kúieýi ony asa qatygezdikpen óltirgen. Qandy oqiǵa Aizattyń eki jasar qyzynyń kóz aldynda bolǵan. Aldymen olardyń arasynda janjal shyqqan. Keiin birneshe saǵat boiy aiaýsyz azaptaý jalǵasqan. Aizattyń denesinde azaptaýdyń belgisi bolǵan – jabyq bassúiek-mi jaraqaty, miynyń isinýi, bassúiektiń negiziniń synýy, qol-aiaq pen jambastyń kóptegen synyǵy, denesinde dóreki betkeimen súirelgen izder. Týystary ony arqanmen atqa bailap, dalada súiregen dep boljaidy", – dep jazdy jýrnalist.
Týystarynyń sózinshe, marqumnyń denesinde saý jer qalmaǵan.
"Politsiianyń málimetinshe, Aizat Jumanova 22 maýsym kúni túngi saǵat 02:30-da Taldyqorǵan qalalyq aýrýhanasyna jetkizilgen. Jarty saǵattan soń dárigerler onyń qaitys bolǵanyn rastaǵan. Alaida týystary buǵan senbeidi. Olar Aizat sol sátke deiin-aq jan tapsyrǵan dep esepteidi", – dep jazdy Dúisenova.
Politsiia bul fakti boiynsha QR QK 106-babynyń 3-bóligimen "Abaisyzda ólimge ákep soqqan aýyr dene jaraqatyn keltirý" baby boiynsha qylmystyq is qozǵaǵan. Alaida týystary bul isti "Asa qatygezdikpen jasalǵan adam óltirý" babyna aýystyrýdy talap etti.
Jetisý oblysy Politsiia departamenti bul derekke bailanysty qylmystyq is qozǵalyp, sotqa deiingi tergeý amaldary júrgizilip jatqanyn habarlady.
"Kúdikti ustalyp, ýaqytsha ustaý izoliatoryna qamaldy. Qylmystyń tolyq jáne obektivti mán-jaiyn anyqtaý maqsatynda barlyq qajetti tergeý amaldary júrgizilýde. Aiǵaqtar jinalyp, saraptamalar taǵaiyndaldy. Barlyq taraptyń ýájderi tekserilip jatyr. Tergeý zań aiasynda, protseske qatysýshylardyń quqyqtary men zańdy múddeleri qatań saqtala otyryp júrgizilýde. Kináliler zańǵa sai jazaǵa tartylady. Tergeý múddesine bailanysty basqa aqparat jariialanbaidy", – delingen politsiia málimdemesinde.
