Astanada Perizat Qairat pen onyń anasyna qatysty sot protsesi jalǵasyp jatyr. Bul joly jábirlenýshiler sotqa qatysqan joq. Olardyń kórsetilimderin prokýror oqyp berdi, dep habarlaidy Dalanews.kz.
Jábirlenýshiler qatarynda Mańǵystaý oblysynyń qazynashylyq departamenti de bar. Departament qyzmetkerleri sý tasqynynan zardap shekkenderge kómektesý úshin 231 500 teńge jinap, ony Biz Birgemiz Qazaqstan 2030 qaiyrymdylyq qoryna aýdarǵan. Aýdarymdy departament basshysy Manarbek Buharbaev óziniń jeke shotynan júrgizgen.
Sondai-aq sotta basqa jábirlenýshilerdiń de málimdemeleri jariia etildi:
– Taldyqorǵandaǵy qus fabrikasynyń bir qyzmetkeri qorǵa 60 myń teńge aýdarǵan;
– ANEKO L kompaniiasy áleýmettik jelilerdegi qordyń belsendi jarnamasyna senip, 3 million teńge kóleminde qaiyrymdylyq jasaǵan.
Osydan keiin sot protsesi jabyq rejimge aýystyryldy. Sebebi taraptar arasynda bank qupiiasyna qatysty málimetter qarastyryldy.
Aita keteiik, buǵan deiin sot otyrysynda Qairatqa 200 mln teńge aýdarǵan kompaniianyń ókili Galia Isaeva sóz sóilegen edi. Onyń aitýynsha, sol kezeńde kompaniiany Perizat Qairattyń áleýmettik jelidegi belsendi jarnamasy sendirgen.
"Prezidenttiń sý tasqyny kezinde jasaǵan úndeýinen keiin basshylyq zardap shekkenderge kómek kórsetý týraly sheshim qabyldady. Bizge Biz Birgemiz qory senimdi uiym bolyp kórindi. 10 mamyr kúni aktsionerlik qoǵamnyń shotynan qorǵa 200 mln teńge aýdardyq. Perizat Qairattyń atynan jariialanǵan jarnamada nesie tólemderin toqtatý týraly úndeý de boldy. Bul da áser etti – shyn máninde, halyqqa jany ashityn adam siiaqty kórindi", – dedi Isaeva.
Sonymen qatar Jusan Bank Perizat Qairattyń qoryn teksermesten 300 mln teńge aýdarǵany týraly málimdegen edi.
Perizat Qairatqa qatysty úsh epizodtyń birinde ol sý tasqynynan zardap shekkenderge kómek kórsetý úshin shamamen 2,9 mlrd teńge jinap, onyń tek 920 mln teńgesin ǵana maqsatty túrde jumsady dep aiyp taǵyldy.
Osy naýqan aiasynda First Heartland Jusan Bank (qazirgi ataýy Alatau City Bank) 300 mln teńge kóleminde qaiyrymdylyq kómek kórsetken. Banktiń ókili Beibit Jorabaevtyń aitýynsha, olarǵa BizBirgemiz Qazaqstan 2030 qorynan Perizat Qairattyń qoly qoiylǵan hat kelgen. Onda qaiyrymdylyq kómek suralǵan. Bul másele banktiń basqarma otyrysynda qaralyp, qarajat qaiyrymdylyq retinde aýdarylǵan.
Alaida Perizat Qairat bul bastamanyń banktiń ózinen shyqqanyn aitady. Osyǵan bailanysty ol sottan PR qyzmetiniń ókili Mihail Egormen bettesýge múmkindik berýdi surady. Aitýynsha, dál sol adammen kelissóz júrgizgen.
Bank bul iske jábirlenýshi tarap retinde tanylǵan. Onyń atynan sotta Jorabaev kýálik berdi.
Qorǵaýshy Aslanbek Davletiarov sot otyrysynda bankten: nelikten dál sol 300 mln teńge urlandy dep senimdi aitasyzdar, bálkim ol qarajat shyn máninde zardap shekkenderge jumsalǵan shyǵar? – dep surady. Onyń sózinshe, Qairat 2024 jyldyń 2 sáýiri men 18 shildesi aralyǵynda 1 mlrd teńgeden astam qarjyny motorly jáne úrmeli qaiyqtarǵa, generatorlarǵa, kiiz úilerge, azyq-túlik pen tehnikalarǵa jumsaǵan.
"Biz tergeý materialdarymen tanystyq, tergeý zań aiasynda júrgizilgenine kóz jetkizdik. Tergeýshi usynǵan barlyq qujattardy oqydyq. Biraq naqty bizdiń qarajat qaida jumsalǵanyn zerttegen joqpyn, sondyqtan bul suraqqa naqty jaýap bere almaimyn", – dedi Jorabaev.
Sondai-aq qorǵaýshy bankten: nelikten iri qarjy uiymy 1–2 mln teńgeni de muqiiat tekserip baryp aýdaratynyna qaramastan, Qairattyń bir ǵana hatyna senip, 300 mln teńgeni aýdardy? – dep suraq qoidy. Jorabaev bul sheshim banktiń basqarma deńgeiinde qabyldanǵanyn aitty. Onyń sózinshe, sol kezde sý tasqynynan tipti banktiń keibir bólimsheleri de zardap shekken, sondyqtan olar kómek berýge niet bildirgen.
Al kúni keshe NZM Perizat Qairattyń qoryna 2,9 million teńge aýdarǵany belgili boldy. Sotta Nazarbaev Ziiatkerlik mektebiniń (NIS) pedagog-uiymdastyrýshysy, kýrator Janerke Sátkimbekova kýá retinde jaýap bergen edi.
Onyń aitýynsha, ata-analar, oqýshylar men ustazdar atalǵan qorǵa 2,9 million teńge kóleminde qarajat aýdarǵan. Bul tólem 2024 jyldyń 10 sáýirinde bank qosymshasy arqyly onlain jasalǵan.
