2025 jyldyń alty aiynda Qytai kompaniialary "Bir beldeý,bir jol" bastamasyna qatysýshy eldermen arada rekordtyq soma - 124 milliard dollardyń kelisimshartyna otyrǵan, bul - búkil 2024 jylǵy jalpy kórsetkishterinen (122 milliard dollar) de asyp túsetin kólem eken, dep habarlaidy Dalanews.kz.
Bul málimetterdi Interfaks-Qazaqstan Avstraliiadaǵy Griffit ýniversiteti men Beijińdegi Jasyl qarjylandyrý jáne damý ortalyǵynyń birlese júrgizgen zertteýine súiene otyryp, alǵa tartady.
2025 jyly qańtar-maýsym ailarynda barlyǵy 176 jańa mámile jasaldy.
"Biylǵy jylǵy qytailyqtar úlesiniń kúrt jandanýy tań qaldyrady, tipti koronavirýs pandemiiasy aiaqtalǵannan bergi belsendiliktiń turaqty ósimine qaramastan. Alaida, 2025 jyl birinshi jartyjyldyqtaǵy árqaisysynyń quny 10 milliard dollardan asatyn birneshe MEGA-mámileler jasalanýymen de erekshelenedi", - deidi zertteý avtory Kristof Nedopil Vang.
Qytai Afrika (39 mlrd dollar) jáne Orta Aziia (25 mlrd dollar) elderinde eń kóp investitsiialyq belsendilik tanytqan. Munai-gaz kelisimsharttary men investitsiialary birinshi jartyjyldyqta rekordtyq kólemge jetti: 44 milliard dollar, onyń 20 milliard dollary Nigeriiadaǵy qaita óńdeý salasyna baǵyttaldy.
Seriktester arasynda Qytai investitsiialaryna eń iri ie bolýshy - Qazaqstan. "Bir beldeý - bir jol" bastamasy sheńberinde elimizge salynǵan investitsiialar kólemi 23 mlrd dollardy quraidy. Bul rette Latyn Amerikasyna jasalǵan investitsiia sońǵy 10 jyldaǵy eń azy bolyp tabylady.
Buǵan deiin saitymyzda Qazaqstanda reseilik biznestiń úlesi qarqyndy túrde azaiyp, onyń ornyna qytailyq jáne ózbekstandyq kompaniialar kelip jatqanyn jazǵanbyz.
