2025 جىلدىڭ التى ايىندا جۇڭگو كومپانيالارى "ءبىر بەلدەۋ،ءبىر جول" باستاماسىنا قاتىسۋشى ەلدەرمەن ارادا رەكوردتىق سوما - 124 ميلليارد دوللاردىڭ كەلىسىمشارتىنا وتىرعان، بۇل - بۇكىل 2024 جىلعى جالپى كورسەتكىشتەرىنەن (122 ميلليارد دوللار) دە اسىپ تۇسەتىن كولەم ەكەن، دەپ حابارلايدى Dalanews.kz.
بۇل مالىمەتتەردى ينتەرفاكس-قازاقستان اۆسترالياداعى گريففيت ۋنيۆەرسيتەتى مەن بەيجىڭدەگى جاسىل قارجىلاندىرۋ جانە دامۋ ورتالىعىنىڭ بىرلەسە جۇرگىزگەن زەرتتەۋىنە سۇيەنە وتىرىپ، العا تارتادى.
2025 جىلى قاڭتار-ماۋسىم ايلارىندا بارلىعى 176 جاڭا مامىلە جاسالدى.
"بيىلعى جىلعى قىتايلىقتار ۇلەسىنىڭ كۇرت جاندانۋى تاڭ قالدىرادى، ءتىپتى كوروناۆيرۋس پاندەمياسى اياقتالعاننان بەرگى بەلسەندىلىكتىڭ تۇراقتى وسىمىنە قاراماستان. الايدا، 2025 جىل ءبىرىنشى جارتىجىلدىقتاعى ءارقايسىسىنىڭ قۇنى 10 ميلليارد دوللاردان اساتىن بىرنەشە مەگا-مامىلەلەر جاسالانۋىمەن دە ەرەكشەلەنەدى"، - دەيدى زەرتتەۋ اۆتورى كريستوف نەدوپيل ۆانگ.
جۇڭگو افريكا (39 ملرد دوللار) جانە ورتا ازيا (25 ملرد دوللار) ەلدەرىندە ەڭ كوپ ينۆەستيسيالىق بەلسەندىلىك تانىتقان. مۇناي-گاز كەلىسىمشارتتارى مەن ينۆەستيسيالارى ءبىرىنشى جارتىجىلدىقتا رەكوردتىق كولەمگە جەتتى: 44 ميلليارد دوللار، ونىڭ 20 ميلليارد دوللارى نيگەرياداعى قايتا وڭدەۋ سالاسىنا باعىتتالدى.
سەرىكتەستەر اراسىندا جۇڭگو ينۆەستيسيالارىنا ەڭ ءىرى يە بولۋشى - قازاقستان. "ءبىر بەلدەۋ - ءبىر جول" باستاماسى شەڭبەرىندە ەلىمىزگە سالىنعان ينۆەستيسيالار كولەمى 23 ملرد دوللاردى قۇرايدى. بۇل رەتتە لاتىن امەريكاسىنا جاسالعان ينۆەستيسيا سوڭعى 10 جىلداعى ەڭ ازى بولىپ تابىلادى.
بۇعان دەيىن سايتىمىزدا قازاقستاندا رەسەيلىك بيزنەستىڭ ۇلەسى قارقىندى تۇردە ازايىپ، ونىڭ ورنىنا قىتايلىق جانە وزبەكستاندىق كومپانيالار كەلىپ جاتقانىن جازعانبىز.
