Jetisý oblysynyń politsiia departamenti 32 jastaǵy áieldiń ólimine qatysty áleýmettik jelide taraǵan jalǵan aqparattar úshin zań aldynda jaýapkershilik qarastyrylatynyn eskertti, dep habarlaidy Dalanews.kz.
“Áleýmettik jelide túrli tekserilmegen joramaldar men negizsiz paiymdar tarap jatyr. Eskertemiz, Qazaqstan Respýblikasynyń zańnamasyna sáikes, jalǵan aqparat taratqany úshin jaýapkershilik kózdelgen. Azamattardy tek resmi aqparat kózderine senýge jáne aldyn ala tergeý barysyna áser etýi, qoǵamdy shatastyrýy múmkin jalǵan málimetterdi jariialamaýǵa shaqyramyz”, – dep málimdedi oblystyq politsiia departamentiniń baspasóz qyzmeti.
Politsiianyń málimetinshe, 22 maýsymda bolǵan áiel ólimine bailanysty aldyn ala tergeý amaldary jalǵasyp jatyr. Kúdikti oqiǵa bolǵan kúnnen bastap qamaýda otyr.
“Qazirgi ýaqytta birqatar sot-meditsinalyq saraptamalar taǵaiyndalyp, olardyń qorytyndylary kútilýde. Saraptama nátijelerine sáikes, prokýratýra organdarymen kelisilgen túrde kúdiktiniń áreketine túpkilikti quqyqtyq baǵa beriletin bolady”, – dep tolyqtyrdy departament ókilderi.
Aita keteiik, buǵan deiin Jetisý oblysynda 32 jastaǵy áieldiń qaza tapqany týraly jazǵan edik. Marqumnyń týystary kúdikti onyń kúieýi ekenin aitady.
Qaiǵyly oqiǵa týraly alǵashqy aqparat jýrnalist Sandýǵash Dúisenovanyń paraqshasynda jariialandy. Oqiǵa Aqsý aýdanyna qarasty Balasaz aýylynda oryn alǵan.
"Kúieýi ony asa qatygezdikpen óltirgen. Qandy oqiǵa Aizattyń eki jasar qyzynyń kóz aldynda bolǵan. Aldymen olardyń arasynda janjal shyqqan. Keiin birneshe saǵat boiy aiaýsyz azaptaý jalǵasqan. Aizattyń denesinde azaptaýdyń belgisi bolǵan – jabyq bassúiek-mi jaraqaty, miynyń isinýi, bassúiektiń negiziniń synýy, qol-aiaq pen jambastyń kóptegen synyǵy, denesinde dóreki betkeimen súirelgen izder. Týystary ony arqanmen atqa bailap, dalada súiregen dep boljaidy", – dep jazdy jýrnalist.
Týystarynyń sózinshe, marqumnyń denesinde saý jer qalmaǵan.
"Politsiianyń málimetinshe, Aizat Jumanova 22 maýsym kúni túngi saǵat 02:30-da Taldyqorǵan qalalyq aýrýhanasyna jetkizilgen. Jarty saǵattan soń dárigerler onyń qaitys bolǵanyn rastaǵan. Alaida týystary buǵan senbeidi. Olar Aizat sol sátke deiin-aq jan tapsyrǵan dep esepteidi", – dep jazdy Dúisenova.
Politsiia bul fakti boiynsha QR QK 106-babynyń 3-bóligimen "Abaisyzda ólimge ákep soqqan aýyr dene jaraqatyn keltirý" baby boiynsha qylmystyq is qozǵaǵan. Alaida týystary bul isti "Asa qatygezdikpen jasalǵan adam óltirý" babyna aýystyrýdy talap etti.
