جەتىسۋ وبلىسىنىڭ پوليسيا دەپارتامەنتى 32 جاستاعى ايەلدىڭ ولىمىنە قاتىستى الەۋمەتتىك جەلىدە تاراعان جالعان اقپاراتتار ءۇشىن زاڭ الدىندا جاۋاپكەرشىلىك قاراستىرىلاتىنىن ەسكەرتتى، دەپ حابارلايدى Dalanews.kz.

“الەۋمەتتىك جەلىدە ءتۇرلى تەكسەرىلمەگەن جورامالدار مەن نەگىزسىز پايىمدار تاراپ جاتىر. ەسكەرتەمىز، قازاقستان رەسپۋبليكاسىنىڭ زاڭناماسىنا سايكەس، جالعان اقپارات تاراتقانى ءۇشىن جاۋاپكەرشىلىك كوزدەلگەن. ازاماتتاردى تەك رەسمي اقپارات كوزدەرىنە سەنۋگە جانە الدىن الا تەرگەۋ بارىسىنا اسەر ەتۋى، قوعامدى شاتاستىرۋى مۇمكىن جالعان مالىمەتتەردى جاريالاماۋعا شاقىرامىز”، – دەپ مالىمدەدى وبلىستىق پوليسيا دەپارتامەنتىنىڭ باسپا ءسوز قىزمەتى.

پوليسيانىڭ مالىمەتىنشە، 22 ماۋسىمدا بولعان ايەل ولىمىنە بايلانىستى الدىن الا تەرگەۋ امالدارى جالعاسىپ جاتىر. كۇدىكتى وقيعا بولعان كۇننەن باستاپ قاماۋدا وتىر.

“قازىرگى ۋاقىتتا ءبىرقاتار سوت-مەديسينالىق ساراپتامالار تاعايىندالىپ، ولاردىڭ قورىتىندىلارى كۇتىلۋدە. ساراپتاما ناتيجەلەرىنە سايكەس، پروكۋراتۋرا ورگاندارىمەن كەلىسىلگەن تۇردە كۇدىكتىنىڭ ارەكەتىنە تۇپكىلىكتى قۇقىقتىق باعا بەرىلەتىن بولادى”، – دەپ تولىقتىردى دەپارتامەنت وكىلدەرى.

ايتا كەتەيىك، بۇعان دەيىن جەتىسۋ وبلىسىندا 32 جاستاعى ايەلدىڭ قازا تاپقانى تۋرالى جازعان ەدىك. مارقۇمنىڭ تۋىستارى كۇدىكتى ونىڭ كۇيەۋى ەكەنىن ايتادى.

قايعىلى وقيعا تۋرالى العاشقى اقپارات جۋرناليست ساندۋعاش دۇيسەنوۆانىڭ پاراقشاسىندا جاريالاندى. وقيعا اقسۋ اۋدانىنا قاراستى بالاساز اۋىلىندا ورىن العان.

"كۇيەۋى ونى اسا قاتىگەزدىكپەن ولتىرگەن. قاندى وقيعا ايزاتتىڭ ەكى جاسار قىزىنىڭ كوز الدىندا بولعان. الدىمەن ولاردىڭ اراسىندا جانجال شىققان. كەيىن بىرنەشە ساعات بويى اياۋسىز ازاپتاۋ جالعاسقان. ايزاتتىڭ دەنەسىندە ازاپتاۋدىڭ بەلگىسى بولعان – جابىق باسسۇيەك-مي جاراقاتى، ميىنىڭ ءىسىنۋى، باسسۇيەكتىڭ نەگىزىنىڭ سىنۋى، قول-اياق پەن جامباستىڭ كوپتەگەن سىنىعى، دەنەسىندە دورەكى بەتكەيمەن سۇيرەلگەن ىزدەر. تۋىستارى ونى ارقانمەن اتقا بايلاپ، دالادا سۇيرەگەن دەپ بولجايدى"، – دەپ جازدى جۋرناليست.

تۋىستارىنىڭ سوزىنشە، مارقۇمنىڭ دەنەسىندە ساۋ جەر قالماعان.

"پوليسيانىڭ مالىمەتىنشە، ايزات جۇمانوۆا 22 ماۋسىم كۇنى تۇنگى ساعات 02:30-دا تالدىقورعان قالالىق اۋرۋحاناسىنا جەتكىزىلگەن. جارتى ساعاتتان سوڭ دارىگەرلەر ونىڭ قايتىس بولعانىن راستاعان. الايدا تۋىستارى بۇعان سەنبەيدى. ولار ايزات سول ساتكە دەيىن-اق جان تاپسىرعان دەپ ەسەپتەيدى"، – دەپ جازدى دۇيسەنوۆا.

پوليسيا بۇل فاكتى بويىنشا ق ر قك 106-بابىنىڭ 3-بولىگىمەن "ابايسىزدا ولىمگە اكەپ سوققان اۋىر دەنە جاراقاتىن كەلتىرۋ" بابى بويىنشا قىلمىستىق ءىس قوزعاعان. الايدا تۋىستارى بۇل ءىستى "اسا قاتىگەزدىكپەن جاسالعان ادام ءولتىرۋ" بابىنا اۋىستىرۋدى تالاپ ەتتى.