Pavlodar oblysynyń Tereńkól aýdanynda prokýratýranyń úilestirýimen jáne UQK departamenti qyzmetkerleriniń qatysýymen "skorost" túrindegi sintetikalyq esirtkini jetkizý arnasy toqtatyldy. Bul týraly Bas prokýratýranyń baspasóz qyzmeti málimdedi, dep habarlaidy Dalanews.kz.
"Tereńkól aýdany prokýratýrasynyń úilestirýimen UQKD qyzmetkerleri aýdan aýmaǵyna sintetikalyq esirtki zattaryn jetkizý arnasyn áshkereledi. Jedel is-sharalar barysynda esirtki zattaryn saqtady degen kúdikpen Tereńkól aýylynyń turǵyny sot sanktsiiasymen qamaýǵa alyndy", – delingen habarlamada.
Tergeý málimetinshe, esirtki satý internet arqyly júzege asyrylyp otyrǵan. Bul qylmys aýdan aýmaǵynda áreket etetin iri esirtki dúkeniniń múddesine jumys istegen.
Nátijesinde taratýǵa daiyn 50 doza esirtki zaty tárkilendi.
Atalǵan derek boiynsha QR QK 297-babynyń 3-bóligi (Esirtki quraldaryn, psihotroptyq zattardy, olardyń analogtaryn ótkizý maqsatynda zańsyz iemdený, saqtaý, tasymaldaý, jóneltý ne ótkizý) boiynsha sotqa deiingi tergeý bastaldy.
