Abai oblysynda jariialanǵan «Taza Qazaqstan» sanitarlyq-ekologiialyq baǵdarlama aiasynda 39,3 myń tonnadan astam turmystyq jáne qurylys qaldyqtary arnaiy poligondarǵa shyǵaryldy. Bul týraly Óńirlik kommýnikatsiialar qyzmetinde ótken brifing barysynda oblystyq Tabiǵi resýrstar jáne tabiǵat paidalanýdy retteý basqarmasynyń tabiǵat qorǵaý baǵdarlamalaryn iske asyrý bóliminiń bas mamany Nurdaýlet Muqashov málimdedi,- dep habarlaidy Dalanews.kz
Biyl sáýir-mamyr ailary aralyǵynda qarqyndy ótkizilip jatqan senbilikterge 227 myńnan astam turǵyn, 10 myńnan asa uiym jáne 4 myńnan astam arnaiy tehnika jumyldyrylǵan. Aýqymdy naýqan barysynda 132 myńnan astam aýla, 1900 saiabaq pen skver, 100 myń metrge jýyq aryq júiesiniń mańy tazartyldy.
— Ekologiialyq tártipti nyǵaitý baǵytynda keshendi sharalar júrgizilýde. Atap aitqanda, eki ailyq aiasynda 6000-ǵa jýyq quqyqbuzýshylyq anyqtalyp, 50 mln teńgeden astam ákimshilik aiyppul salyndy. Buqaralyq aqparat quraldary men áleýmettik jelilerde 200-den astam aqparattyq material jariialanyp, turǵyndarǵa túsindirý jumystary belsendi túrde júrgizildi. Sonymen qatar mektepter men kolledjderde 600-den astam ekologiialyq shara ótti, — dedi Nurdaýlet Muqashov.
Kóktemgi kógaldandyrý jumystary da qarqyndy júrgizilgen. Biylǵy 26 sáýirde ótken «Búkilqazaqstandyq aǵash otyrǵyzý kúni» kezinde óńir aýmaǵynda 23 myńnan astam kóshet otyrǵyzyldy. Sonymen qatar «Túlekterdiń aǵash egýi» jáne «Bolashaqty birge otyrǵyzamyz» ekologiialyq aktsiialary barysynda 11 myńnan astam aǵash egilgen. «Semei ormany» aýmaǵynda 1,5 gektar jerge 3400-den astam jasyl jelek otyrǵyzylǵan.
Jasyl infraqurylymdy damytý maqsatynda óńirde jańa qurylym — «Jasyl El Abai» kommýnaldyq memlekettik mekemesi quryldy. Mekemeniń direktorynyń orynbasary Damir Rahimjanovtyń aitýynsha, aldaǵy ýaqytta kóshethana men jylyjai salynyp, Semei qalasynyń sol jaǵalaýynda «jasyl beldeý» qalyptastyrý josparlanǵan.
— Sonymen qatar Beibitshilik aralynda ekosaiabaq pen balalarǵa arnalǵan demalys alańdaryn salý, Ozer aýyldyq okrýginde ashyq topyraqta kóshet ósiretin arnaiy agroaimaq daiyndaý jumystary qolǵa alynady, — dep túiindedi «Jasyl el Abai» KMM direktorynyń orynbasary Damir Rahimjanov.
Ekologiialyq mádenietti nyǵaitý, qorshaǵan ortany saqtaý jáne kógaldandyrý baǵytynda júieli jumystar jalǵasyn tappaq.
