Ótken jyly oblystyq zooparazitologiialyq top quramdarymen barlyǵy 781 eldi mekende barlaý jumystary júrgizilgen. Synama nátijeleri kórsetkendei jinalǵan 62 918 dana keneniń 136-nan Kongo-qyrym gemoragiialyq qyzbasy aýrýynyń qozdyrǵyshy anyqtalǵan. Bul týraly Túrkistan oblysy sanitariialyq-epidemiologiialyq baqylaý departamenti basshysynyń orynbasary Aqerke Erkinbekova málimdedi,- dep habarlaidy Dalanews.kz
«Oblysta 2024 jyly Kongo-qyrym gemoragiialyq qyzbasy aýrýyna 11 adam shaldyqqan. Naýqastardyń tórteýin kene shaqqan, altaýy mal kútimimen ainalysqan, al bireýi tabiǵi oshaqta egistikpen ainalysqan. Atalǵan oshaqta epidemiiaǵa qarsy jáne juqtyrý kózin anyqtaý maqsatynda epidemiologiialyq, zooaparazitologiialyq tekserý jumystary tolyq júrgizilip, qorajailar men aýylsharýashylyq maldarynan barlyǵy 3 468 kene jinalyp, 16 synamadan atalǵan aýrýdyń qozdyrǵyshy anyqtaldy. Aita keteiik, ótken jyly óńirde barlyǵy – 1 416 turǵyndy kene shaǵyp meditsinalyq uiymdarǵa qaralǵan. Al biylǵy jyldyń basynan osy kúnge deiin atalmysh aýrýdy juqtyrǵan 1 jaǵdai tirkelip otyr. Oblys boiynsha 2025 jyldyń búgingi kúnine deiin barlyǵy 597 adamdy kene shaǵyp, azamattar meditsina qyzmetkerleriniń kómegine júgingen», - dedi spiker.
Odan bólek, oblys aýmaǵynda jiti ishek infektsiiasynyń aldyn-alý boiynsha atqarylyp jatqan jumystar baiandaldy.
«Oblys boiynsha 2025 jyldyń 6 aiynda jiti ishek infektsiiasynyń epidemiologiialyq ahýaly turaqty. Biylǵy jyldyń 6 aiynda 148 jaǵdai tirkelgen. 2024 jyldyń sáikes kezeńimen salystyrǵanda halyqtyń jiti ishek infektsiialary tobymen aýrýshańdyǵy 22 jaǵdaiǵa ósken», - dedi spiker.
