Abai oblysynda memlekettik organdardyń ókilderin, qoǵamdyq uiymdardy, sarapshylardy, pedagogter men belsendi ákelerdi biriktirgen «Áke ónegesi – ómirlik sabaq» atty óńirlik forým ótti. Qatysýshylar otbasy institýtyn nyǵaitý, balalar tárbiesindegi ákeniń rólin arttyrý jáne jastar arasyndaǵy áleýmettik máselelerdiń aldyn alý máselelerin talqylady, dep habarlaidy dalanews.kz.
Is-shara plenarlyq otyrys jáne taqyryptyq pikirtalas alańdary formatynda uiymdastyryldy. Forým barysynda qatysýshylar otbasy aldynda turǵan zamanaýi syn-qaterler týraly pikir almasyp, ata-analar men balalar arasyndaǵy ózara qarym-qatynastyń úzdik tájiribelerin qarastyrdy.
Forým jumysyn ashqan Abai oblysy ishki saiasat basqarmasy basshysynyń orynbasary Arman Jemagýlov alda kele jatqan Ákeler kúniniń mańyzdylyǵyn atap ótip, urpaq tárbieleýdegi otbasynyń erekshe róline toqtaldy.
– Eń aldymen, barshańyzdy aldaǵy merekemen – Qazaqstanda dástúrli túrde maýsym aiynyń úshinshi jeksenbisinde atap ótiletin Ákeler kúnimen quttyqtaýǵa ruqsat etińizder. Bul árdaiym erekshe kún. Memleket basshysy otbasy institýtyn saqtaý men damytýǵa, sondai-aq jas urpaqty tárbieleýge árdaiym airyqsha kóńil bóledi. Sanaly urpaq – memlekettiń berik negizderiniń biri. Bul rette ákelerge júkteler jaýapkershilik erekshe. Búgingi forýmnyń basty maqsaty – ákelerdi qurmetteý ǵana emes, otbasy institýtyn nyǵaitý jáne damytý, sondai-aq jastar tárbiesine qatysty ózekti máselelerdi talqylaý. Forým barysynda pikir almasyp, ákeler men balalar arasyndaǵy ózara qarym-qatynasqa qatysty eń mańyzdy máselelerdi qarastyramyz, – dedi Arman Jemagýlov.
Qazaqstan Respýblikasy Prezidenti janyndaǵy Áielder isteri jáne otbasylyq-demografiialyq saiasat jónindegi ulttyq komissiianyń múshesi Aigerim Sársenbaeva ákelik jaýapkershiliktiń ádiletti ári qaýipsiz qoǵam qurýdaǵy mańyzy jáne árbir ata-ananyń jeke jaýapkershiligi týraly baiandady.
– Memleket basshysy Ulttyq quryltai barysynda bizdiń ortaq maqsatymyz – Zań men tártip qaǵidattary ústemdik etetin Ádiletti Qazaqstandy qurý ekenin atap ótti. Bul mindet – elimizdiń árbir azamatynyń jeke jaýapkershiligi. Ákeler forýmy elimizdiń barlyq óńirlerinde jyl saiyn ótkizilip keledi jáne jaqsy dástúrge ainaldy. Bul alańda biz ákelerdiń lýdomaniia, nashaqorlyq, turmystyq zorlyq-zombylyq siiaqty zamanaýi qoǵamnyń keleńsiz qubylystarymen kúrestegi rólin talqylaimyz. Qazirgi zamanǵy áke – jai ǵana otbasy basshysy emes, ol balalar tárbiesine tikelei yqpal etetin sanaly ata-ana. Qoǵamda mundai úlginiń oń nátijelerin kórsetetin mysaldar jetkilikti, – dedi Aigerim Sársenbaeva.
Óz kezeginde tarih ǵylymdarynyń kandidaty, professor Aman Rahmetýllin otbasynyń qoǵamdaǵy negizgi institýt retindegi tarihi mańyzdylyǵyna jáne bolashaq urpaqty tárbieleýdegi ata-analardyń jaýapkershiligine nazar aýdardy.
– Tarihi turǵydan alǵanda, otbasy institýty kez kelgen qoǵamdaǵy eń mańyzdy institýttardyń biri bolyp kelgen. Otbasynsyz qoǵamnyń damýy múmkin emes, óitkeni otbasy – tárbie men bolashaqqa baǵyt-baǵdar beretin orta. Bizdiń bolashaǵymyz tikelei otbasyǵa bailanysty. Keibir ákeler: «Balalarym toq, kiimi bútin, baspanasy bar, demek men otbasy úshin bárin jasap júrmin» dep oilaidy. Bul tolyqtai durys emes. Munyń bári – ákeniń mindeti. Tárbie berý de ákeniń jaýapkershilik aimaǵyna jatady ári bul tek uldarǵa ǵana emes, qyzdarǵa da qatysty. Lýdomaniia, kiberbýlling jáne qatygezdik kórinisteri kei jaǵdaida ákelik tárbiedegi olqylyqtardyń saldary bolýy múmkin. Bul – qoǵam bolyp talqylaýdy qajet etetin mańyzdy másele, – dedi Aman Rahmetýllin.
Plenarlyq otyrystan keiin forým jumysy taqyryptyq alańdarda jalǵasty. Onda qatysýshylar otbasylyq tárbie, otbasyndaǵy ákeniń rólin kúsheitý, jasóspirimder arasyndaǵy táýeldilikterdiń aldyn alý, sondai-aq jastar arasynda dástúrli otbasylyq qundylyqtardy qalyptastyrý joldaryn talqylady. Talqylaý qorytyndysy boiynsha qatysýshylar tájiribe almasyp, otbasy institýtyn odan ári damytýǵa jáne qoǵamdaǵy ákelik róldiń mańyzyn arttyrýǵa baǵyttalǵan usynystar ázirledi.
