Biyl Semeide Qala kúni «Semeidi súiý – tarihqa bas iiý!» taqyrybymen atalyp ótti. Jeti kúnge sozylǵan merekelik aptalyq aiasynda mádeni, sporttyq jáne tanymdyq baǵyttaǵy 20-dan astam aýqymdy is-shara uiymdastyrylyp, 150 myń adam qamtyldy, dep habarlaidy dalanews.kz.
Mereke aiasynda ulttyq sportty ulyqtaǵan báige uiymdastyryldy. Sonymen qatar aýdaryspaq, qol kúres, gir kóterý jáne arqan tartystan jarystar ótip, qatysýshylar kúsh-qairaty men eptiligin synǵa saldy.
Sondai-aq kúsh pen jigerdi synaǵan «Semei batyry» týrniri, salaýatty ómir saltyn dáriptegen «TUNGI RUN – SEMEY» túngi júgirý sharasy ótti. Balalardyń óner baiqaýy, qolóner jármeńkesi men sporttyq saiystar turǵyndar men qala qonaqtarynyń basyn qosyp, merekelik kóńil kúi syilady.
Merekelik aptalyq Qaraǵaily shaǵynaýdanyndaǵy Respýblika alańynda ótken aýqymdy Open Air gala-kontsertimen qorytyndylandy. Sahnada Turar Ydyrys, Aidana Medenova, AYREE, Ernar Amandyq, sondai-aq Qyrǵyzstannan AMIRCHIK, Germaniiadan NANA DARKMAN jáne Moldovadan ARSENIUM FROM O-ZONE óner kórsetti. Keshti Jazira Erkin men DAKE júrgizdi.
Gala-kontserttiń ashylýynda sóz sóilegen oblys ákimi Berik Ýáli barsha semeilikterdi Qala kúnimen quttyqtady.
«Barshańyzdy Semei qalasynyń týǵan kúnimen shyn júrekten quttyqtaimyn! Semei – tarihy tereń, taǵylymy mol, Alashtyń astanasy bolǵan erekshe qala. Semeidi súiý – tarihqa bas iiý. Qazaq memlekettiginiń tarihy Semei qalasymen tyǵyz bailanysty. Alash qairatkerleri osy qalada qyzmet etti. Semei – tuńǵyshtar mekeni. Tuńǵyshtardyń barlyǵy Semei topyraǵynda dúniege kelgen. Biz osymen maqtanamyz. Búginde Semei qalasy Memleket basshysynyń tikelei qoldaýynyń arqasynda kúnnen kúnge kórkeiip keledi. Biyl oblys ortalyǵyndaǵy 700-ge jýyq turǵyn úige alǵash ret jazda ystyq sý berildi. Júzge jýyq kósheler jańartylyp, aýlalar abattandyrylyp, joldar jóndelip, jańa keiipke enip jatyr. «Abaiǵa qurmet» aktsiiasy aiasynda kóptegen mádeniet, sport nysandary salynýda. Biyl Qala kúni alǵash ret keń aýqymda, bir apta kóleminde, joǵary deńgeide atap ótildi. Týǵan qalamyzdyń ósip-órkendeýine úles qosyp, árbir igi iske qoldaý bildirip júrgen barsha azamattarǵa alǵys bildiremin», – dedi aimaq basshysy.
Turǵyndarǵa qolaily bolýy úshin gala-kontserttiń tikelei kórsetilimi Arbat aýmaǵynda jáne Muhtar Áýezov alańynda uiymdastyryldy. Merekelik kesh jarqyn otshashýmen aiaqtaldy.
