Tarazdaǵy "Áýlie-Ata" halyqaralyq áýejaiy aviaotyndy monopoliialyq joǵary baǵamen satqany úshin jaýapqa tartyldy. Sot kásiporynǵa 3,2 mln teńge aiyppul salyp, zańsyz alynǵan 25,2 mln teńge monopoliialyq kiristi tárkileý týraly sheshim shyǵardy, dep habarlaidy dalanews.kz.
Básekelestikti qorǵaý jáne damytý agenttiginiń Jambyl oblysyndaǵy departamenti áýejaidyń aviaotyn baǵasyn qalai belgilegenin teksergen. Naryqtaǵy báseke men baǵa ózgerisin taldaý nátijesinde aviakerosinniń baǵasy negizsiz joǵary qoiylǵany anyqtaldy.
Áýejai tekserý qorytyndysymen kelispei, ony eki sot satysynda daýlaǵan. Alaida Jambyl oblystyq soty tergeý nátijesin zańdy ári negizdi dep tanydy. Keiin Taraz qalasynyń ákimshilik quqyq buzýshylyqtar jónindegi mamandandyrylǵan sotynda áýejai ókilderi kinásin moiyndaǵan.
Aiyppul men monopoliialyq kiristi tárkileýden bólek, antimonopoliialyq organ áýejaiǵa zań buzýshylyqty toqtatyp, aviakerosinge ekonomikalyq turǵydan negizdelgen baǵa belgileýdi tapsyrdy.
Buǵan deiin de Qazaqstannyń basqa áýejailarynda aviaotyn satýǵa qatysty zań buzýshylyqtar anyqtalǵan. Máselen, Astana áýejaiynyń otyn jetkizýshilerden alǵan alymy boiynsha tekserý júrgizilse, Túrkistan áýejaiy kásipkerlerden áýejai aýmaǵynda aviaotyn satý quqyǵy úshin aqy alǵany úshin aiyppul arqalaǵan.
