Elordanyń sportshylary, jattyqtyrýshylary, Astana qalasynyń Dene shynyqtyrý jáne sport basqarmasynyń qyzmetkerleri jáne oǵan qarasty uiymdar «Taza Qazaqstan» respýblikalyq bastamasy aiasynda Dúniejúzilik tazalyq kúni – World Cleanup Day-ge orailastyrylǵan jalpy qalalyq ekologiialyq aktsiiaǵa qatysty, dep habarlaidy dalanews.kz.
Elorda sport salasynyń 100-ge jýyq ókili Ǵashyqtar saiabaǵy men «Han Shatyr» saýda jáne oiyn-saýyq ortalyǵy mańyndaǵy aýmaqty tazalaýǵa shyqty.
Is-sharaǵa Astana qalasynyń Dene shynyqtyrý jáne sport basqarmasynyń basshysy, bokstan Olimpiada oiyndarynyń kúmis júldegeri Vasilii Levit qatysty. Keibir qyzmetkerler ekologiialyq aktsiiaǵa balalarymen birge kelip, otbasymen birge qatysty.
Qatysýshylar aýmaqty qoqys pen qýraidan tazalap, japyraqtardy jinap, irgeles aýmaqtardy retke keltirdi.
«Búgin ujymymyz sportshylar men jattyqtyrýshylarmen birge dástúrli túrde jalpy qalalyq ekologiialyq aktsiiaǵa qoldaý kórsetti. Ǵashyqtar saiabaǵy men «Han Shatyr» mańyndaǵy aýmaqty tazalaýǵa júzge jýyq adam shyqty. Mundai bastamalardy elordanyń sportshylary árdaiym qoldaidy. Óz qalasyna jáne qorshaǵan ortaǵa qurmetpen qaraý mádenietiniń erte jastan qalyptasýy mańyzdy. Tazalyq eń aldymen árqaisymyzdan bastalady», – dedi Vasilii Levit.
Sonymen qatar ekologiialyq is-sharalar beiindi basqarmaǵa qarasty sport nysandary men uiymdardyń aýmaǵynda da ótti. Qyzmetkerler, jattyqtyrýshylar men sportshylar irgeles aýmaqtardy sanitarlyq tazalap, abattandyrý jumysyn júrgizdi.
Atap aitqanda, sport mektepteriniń ujymdary óz nysandarynyń aýmaǵyn retke keltirdi. №4 sport mektebiniń ókilderi akademiialyq esý jáne eskek esýdiń basqa da túrleri boiynsha jattyǵýlar ótetin esý arnasy mańyndaǵy aýmaqty tazalady. Aktsiiaǵa «Arǵymaq» at sporty jáne ulttyq sport túrleri klýbynyń, Prigorodnyi turǵyn alabyndaǵy «Aspan» sport kesheni aýmaǵynda ornalasqan Olimpiadalyq rezerv daiarlaý ortalyǵynyń, elordanyń dene shynyqtyrý-saýyqtyrý keshenderiniń, sondai-aq hokkeige mamandanǵan №10 sport mektebiniń ujymdary da qatysty.
Basqarmaǵa qarasty uiymdarda jumystar irgeles aýmaqtarda da, sport nysandarynyń ishinde de júrgizildi: qatysýshylar qoqys pen qýraǵan ósimdikterdi jinap, aýlalar men ǵimarattardy retke keltirdi, sondai-aq qajetti sharýashylyq jumysyn atqardy.
Osylaisha, ekologiialyq aktsiia elordanyń ártúrli aýdandaryndaǵy sport nysandaryn qamtyp, sportshylardy, jattyqtyrýshylardy jáne sport uiymdarynyń qyzmetkerlerin biriktirdi.
