Qazaqstandyq shahmatshy, álem chempiony **Bibisara Asaýbaeva**nyń anasy Liana Tańjaryqova áleýmettik jelidegi paraqshasynda otbasyǵa bólinetin qarjy týraly pikir bildirdi, dep habarlaidy dalanews.kz.
Onyń aitýynsha, jurt arasynda sportshynyń otbasyna memleketten qomaqty qarjy bólinedi degen qate túsinik qalyptasqan.
«Biz memleketten ai saiyn 320 myń teńge jáne álem chempionatyndaǵy jeńis úshin 2300 AQSh dollary kóleminde syiaqy alamyz. Mańǵystaý oblystyq sport basqarmasynan eshqandai jalaqy almaimyz», – dep jazdy ol.
Sondai-aq Tańjaryqova Sport Qory sportty qoldaý qory men federatsiia bóletin qarajattyń biýdjet qarjysy emes ekenin atap ótti. Onyń sózinshe, bul qarajat sportshy komandasynyń jumysyna tikelei jumsalady.
Ol federatsiia jelisi arqyly tólenetin barlyq syiaqy men júlde qarajaty sportshynyń adal eńbegimen tabylǵan jeke tabysy ekenin aitty.
«Biz de Qazaqstannyń ózge azamattary siiaqty salyq tóleimiz», – dedi ol.
Liana Tańjaryqova memlekettik qarjylandyrý, jeke demeýshilik jáne biýdjetten tys qarajat uǵymdaryn shatastyrmaýǵa shaqyrdy.
«Qorytyndylai kele, memlekettik qarjylandyrýdy, jeke jáne biýdjetten tys qarajatty ajyrata bilý mańyzdy. Qandai da bir qorytyndy jasap, kópshilik aldynda málimdeme jasamas buryn derekterdi teksergen jón. Ózgeniń eńbegin qurmetteý – óz sózińe jaýapkershilikpen qaraýdan bastalady», – dep jazdy ol.
