Ál-Farabi atyndaǵy Qazaq ulttyq ýniversitetinde «Quantum AI» zerthanasynyń saltanatty ashylý rásimi ótti. Aqparattyq tehnologiialar jáne jasandy intellekt fakýltetiniń bazasynda qurylǵan jańa ǵylymi-bilim berý ortalyǵy respýblika aýmaǵyndaǵy balamasyz ári teńdessiz innovatsiialyq ortalyq retinde iske qosyldy, dep habarlaidy dalanews.kz.
Aýqymdy joba aldyńǵy qatarly kvanttyq júielerdi óndirýge mamandanǵan SpinQ Technology (QHR) halyqaralyq tehnologiialyq kompaniiasynyń qoldaýymen júzege asyryldy.
Jańa ortalyqqa zamanaýi jeti kvanttyq esepteý júiesi jetkizildi. Búgingi tańda bul – Qazaqstan aýmaǵyndaǵy jalǵyz kvanttyq kompiýterler. Biregei jabdyqtar stýdentter men izdenýshilerge oqý sabaqtary men zerthanalyq jumystardy joǵary deńgeide júrgizýge, kúrdeli ǵylymi-zertteý jobalaryn oryndaýǵa jáne mashinalyq oqytýdyń biregei algoritmderin ázirleýge múmkindik beredi.
Saltanatty sharada sóz alǵan QazUÝ Basqarma Tóraǵasy – Rektor Janseiit Túimebaev bul qadamnyń ýniversitetti álemdik deńgeidegi zertteý ortalyǵyna transformatsiialaýdaǵy róli zor ekenin qadap aitty. «Qazirgi ýaqytta jasandy intellekt, úlken derekter men kvanttyq esepteýler álemdik ǵylym men ekonomikanyń jańa baǵytyn aiqyndap otyr. Kvanttyq tehnologiialar men JI integratsiiasy kriptografiia, meditsina jáne kúrdeli júielerdi modeldeý salasyndaǵy buryn klassikalyq kompiýterlerdiń qaýqary jetpegen eń kúrdeli mindetterdi sheshýge jol ashady», – dedi ýniversitet basshysy.
Rektor óz sózinde bilim, ǵylym jáne óndiristi ushtastyrý baǵyty jalǵasatynyn, al zerthana nátijeleri elimizdiń tehnologiialyq egemendigin nyǵaitýǵa septigin tigizetinine senim bildirdi.
Aqparattyq tehnologiialar jáne jasandy intellekt fakýltetiniń dekany Timýr Imanqulovtyń aitýynsha, otandyq mamandar ozyq jabdyqtarmen jumys isteýge tolyq daiyn. Jańa zerthana joǵary kýrs stýdentterine tájiribeli tálimgerlermen birlesip, naqty óndiristik jobalarǵa qatysa alatyn ashyq platforma retinde qyzmet etedi. Bul baza fakýltet túlekteriniń halyqaralyq eńbek naryǵyndaǵy básekege qabilettiligin aitarlyqtai arttyrady.
Sharada kópshilikke «Quantum AI» zerthanasynyń jáne mashinalyq oqytýdyń biregei algoritmderin ázirleý josparlary keńinen tanystyryldy.
