Túrkiia Respýblikasynda «QazAgroQarjy» AQ, AGROMASH zaýyty, Eurasia Group AG jáne Lindsay Corporation arasynda yntymaqtastyq týraly memorandýmǵa qol qoiyldy, dep habarlaidy dalanews.kz.
Qujat Qazaqstanda zamanaýi irrigatsiialyq infraqurylymdy damytýǵa, óndiristi jergiliktendirýdi keńeitýge jáne otandyq agrarshylar úshin ozyq sýarý tehnologiialarynyń qoljetimdiligin arttyrýǵa jańa múmkindikter ashady.
Buǵan deiin Qazaqstan Respýblikasynyń Premer-Ministri Oljas Bektenovtiń tóraǵalyǵymen «Báiterek» UIH» AQ, QR Ónerkásip jáne qurylys ministrligi, QR Aýyl sharýashylyǵy ministrligi, Lindsay Corporation, AGROMASH jáne Eurasia Group AG arasynda strategiialyq kelisimge qol qoiylǵan bolatyn. Qol jetkizilgen ýaǵdalastyqtardy iske asyrýdyń mańyzdy kezeńderiniń biri retinde ónerkásiptik kooperatsiia týraly kelisim aiasynda alǵashqy mashina jinaqtary AGROMASH zaýytyna jetkizildi. Bul jobanyń kelissózder kezeńinen praktikalyq iske asyrý kezeńine ótkenin aiqyn kórsetedi.
Seriktestikti damytý jónindegi jumysty jalǵastyra otyryp, Qazaqstan delegatsiiasy Túrkiia Respýblikasyndaǵy Lindsay Corporation kompaniiasynyń óndiristik keshenderiniń birine bardy.
«Sapar barysynda biz irrigatsiialyq júielerdi óndirýdegi zamanaýi tehnologiialarmen tanysyp, óndiristi jergiliktendirý, tehnologiialar transferti jáne seriktestikti keńeitý perspektivalaryn talqyladyq. Biz sýarý salasyndaǵy sheshimderdiń qazaqstandyq fermerler úshin qoljetimdi bolýyna bar kúshimizdi salýdamyz», – dedi AGROMASH zaýytynyń prezidenti Dinara ShÚKIJANOVA.
Kezdesý barysynda qazaqstandyq aýyl sharýashylyǵy taýaryn óndirýshilerge arnalǵan jańbyrlatyp sýarý mashinalaryn jetkizýdi qarjylandyrý tetikterine erekshe nazar aýdaryldy.
«Qazirgi ýaqytta «QazAgroQarjy» AQ-da zamanaýi irrigatsiialyq júielerdi jyldyq 12,6%-dan bastalatyn mólsherlememen jeńildikti lizingtik qarjylandyrý baǵdarlamasy jumys isteidi. Bul baǵdarlama agrarshylar úshin sý únemdeý tehnologiialarynyń qoljetimdiligin arttyrýǵa, sýarmaly eginshilikti damytý qarqynyn jedeldetýge jáne aýyl sharýashylyǵy óndirisiniń tiimdiligin kóterýge múmkindik beredi», – dedi «QazAgroQarjy» AQ Basqarma tóraǵasynyń orynbasary Aidos SEITJANOV.
Irrigatsiia salasyndaǵy álemdik kóshbasshy Lindsay Corporation kompaniiasymen yntymaqtastyqty damytý aýyl sharýashylyǵy mashina jasaý salasyndaǵy lokalizatsiialaýdeńgeiin arttyrý jáne Qazaqstannyń agroónerkásiptik keshenine ozyq tehnologiialardy engizý jolyndaǵy mańyzdy qadam.
«Búginde azyq-túlik qaýipsizdigin qamtamasyz etý sý resýrstaryn tiimdi basqarýsyz múmkin emes. Sondyqtan zamanaýi sýarý júielerin damytý ónimdilikti arttyrýdyń, aýyl sharýashylyǵy óndirisiniń turaqtylyǵyn qamtamasyz etýdiń jáne qazaqstandyq agrarshylardyń básekege qabilettiligin kúsheitýdiń negizgi faktorlarynyń birine ainalyp otyr», – dedi Eurasia Group AG kompaniiasynyń direktory Sergei GLOKKE.
Eske sala keteiik, osy jyldyń sáýir aiynda Qazaqstan Ortalyq Aziianyń negizgi ónerkásiptik haby mártebesin nyǵaitty. Qazaqstandyq mashina jasaýshylardyń jańa seriktesteri qataryn salanyń jetekshi kompaniialary – Väderstad, Dewulf, Lindsay Corporation, Amity Technology, Vervaet, Kuhn Group jáne Brandt Agricultural Products tolyqtyrdy.
