Jumys sapary aiasynda Almaty ákimi Darhan Satybaldy megapolistiń negizgi sport nysandaryn aralap, infraqurylymnyń qazirgi jai-kúiimen jáne ony damytý josparymen tanysty,- dep habarlaidy Dalanews.kz
Birinshi nysan 1958 jyly salynǵan Almatynyń eń tanymal sport oryndarynyń biri Ortalyq stadion boldy. Aralaý barysynda ákimge stadionnyń jeńil atletika infraqurylymyn saqtai otyryp, halyqaralyq standarttarǵa sáikes jańǵyrtýdy qajet etetini baiandaldy. Arenaǵa buryn 35 myńǵa deiin kórermen siiatyn. Búginde onyń qýattylyǵy 23 myń. Sonymen qatar stadion men kórshiles iri nysandar M.Áýezov atyndaǵy drama teatry men Qazaq memlekettik tsirki arasyndaǵy jaiaý júrginshiler qatynasy buzylyp, kóliktiń qoljetimdiligine de, qala ortasynyń qaýipsizdigine de áser etedi.
«Ortalyq stadiondy retke keltirý kerek. Sanitarlyq toraptardan bastap, stadion ainalasyndaǵy jaiaý júrginshiler jolyna deiin barlyǵyn qaita jasaý qajet. Bul mańyzdy memlekettik nysan jáne ol zamanaýi talaptarǵa sai, turǵyndarǵa yńǵaily, qaýipsiz ári qoljetimdi bolýy kerek», - dedi Almaty ákimi.
Qala basshysy bilet operatorlarymen tolyq integratsiiany qamtamasyz ete otyryp, Ortalyq stadionda biletterdi esepke alýdyń tsifrlyq júiesin engizýdi tapsyrdy.
Darhan Satybaldy Balýan Sholaq atyndaǵy Sport saraiyn da aralap kórdi. Munda mánerlep syrǵanaý jáne hokkei jattyǵýlary, sondai-aq túrli mádeni is-sharalar ótedi. Qala ákimi muz arenasynan bastap kiim aýystyratyn bólmeler men jattyǵý zaldaryna deiin joǵary sapaly jaǵdaidy saqtaý qajettigine nazar aýdardy.
Kelesi nysan sport salasyndaǵy daryndy balalarǵa arnalǵan mamandandyrylǵan mektep-internaty boldy. Munda olimpiadalyq sporttyń 19 túrinen ulttyq jáne qalalyq komandaǵa arnalǵan sporttyq rezerv daiyndalady. Ǵimarat 1935 jyly salynǵan jáne búginde túbegeili jóndeýdi qajet etedi.
Tehnikalyq jai-kúii men seismikalyq tózimdiligin zertteý qorytyndysy boiynsha burynnan bar ǵimarattardy buzyp, jańasyn salý týraly sheshim qabyldandy. Joba memlekettik saraptama satysynda. Qurylys jumystary 2025 jyly kúzde bastalmaq. Jumys saparynyń qorytyndysy boiynsha qala ákimi sportpen shuǵyldaný úshin qaýipsiz jaǵdaidy saqtai otyryp, jobalaý jáne qurylys protsesterin jedeldetýge baǵyttalǵan birqatar naqty tapsyrma berdi.
