Densaýlyq saqtaý ministri Aqmaral Álnazarova Facebook paraqshasynda qazaqstandyqtarǵa úndeý joldap, dárigerlerge jasalǵan shabýyldardy qoǵam qaýipsizdigine tóngen qater dep atady. Ministr bul málimdemesin Qaraǵandy men Qostanaida bir kúnde bolǵan eki aýyr oqiǵadan keiin jariialady, dep habarlaidy Dalanews.kz.
“Qurmetti otandastar! Sizderge perzenthanada medbike, balalar aýrýhanasynyń qabyldaý bóliminde kezekshi jáne ordinator bolyp eńbek etken maman retinde ún qatyp otyrmyn. Dárigerlerge jasalatyn zorlyq-zombylyqty toqtatyńyzdar! Óz balalaryńyzdy, ata-analaryńyzdy, jaqyndaryńyzdy aman alyp qalýǵa janyn salǵan dáriger men meiirbikeniń boiyn jailaǵan qorqynysh, qorǵansyzdyq pen qorlyqty elestetýdiń ózi aýyr. Bul — aqtaýǵa kelmeitin, jabaiylyqqa tán áreket”, – dep jazdy ministr.
Onyń aitýynsha, mundai shabýyldardy turmystyq kikiljiń retinde emes, tutas qoǵam úshin qaýipti qubylys retinde baǵalaý qajet.
Aqmaral Álnazarova Qaraǵandy men Qostanaida bir kúnde bolǵan oqiǵalarǵa alańdaýshylyq bildirdi. Qaraǵandyda jekemenshik emhananyń meiirbikege shabýyl jasalsa, Qostanai oblystyq aýrýhanasynda ýrologiia bóliminiń jas hirýrgi naýqastyń soqqysynan esinen tanyp, jansaqtaý bólimine túsken. Naýqas óz kezegin kútkisi kelmegeni úshin dárigerge qol kótergen. Qazir dárigerdiń jaǵdaiy aýyr.
“Kún saiyn adam ómirin qutqaryp júrgen janǵa qol kóterý úshin adam qandai qatygezdik pen tasbaýyrlyq deńgeiine túsýi kerek? Bul - aqylǵa qonymsyz ári keshirilmeitin jaǵdai. Beibit kúnde dárigerler óz jumys ornynda ómirine qaýip tónip turǵanyn oilaýy tiis emes”, – dedi ministr.
Ol mundai jaǵdailardyń aldyn alý úshin shuǵyl sharalar qajet ekenin aitty. Atap aitqanda, ministr táýlik boiy jumys isteitin qabyldaý bólimderine, balalar men perinataldyq ortalyqtarǵa kúzetti kúsheitýdi usyndy. Sonymen qatar halyq arasynda dárigerlerge degen alǵys aitý mádenietin qalyptastyryp, olardyń eńbegine qurmetpen qaraýdy tárbieleý qajet ekenin jetkizdi.
Eske salaiyq, 17 shildede Qostanaida kezegin kútkisi kelmegen patsient jas hirýrgke judyryq jumsap, dáriger aýyr jaraqatpen jansaqtaý bólimine tústi. Kúdikti ustalyp, tergeý bastaldy.
