Qazaqstandyq «Kazakhmys Barlau» kompaniiasy Aýǵanstannyń taý-ken salasynda geologiialyq barlaý jumystaryn bastap ketti, dep habarlaidy Dalanews.kz.
Kompaniia Aýǵanstandy paidaly qazbalar óndirýge bolashaǵy zor aimaq retinde sipattap, bul elde qorǵasyn men myryshtyń joǵary sapaly qory bar ekenin málimdedi.
Sonymen qatar, Taý-ken jáne munai ónerkásibi ministrligi Kabýl men Astana arasyndaǵy tyǵyz bailanysqa silteme jasai otyryp, Aýǵanstanda mol tabiǵi resýrstar baryn jáne Qazaqstannyń osy bailyqtarǵa investitsiia salýǵa múmkindigi baryn aitty.
Taý-ken jáne munai ónerkásibi ministrliginiń ókili Homaiýn Aýgannyń sózinshe, Qazaqstan bir jaǵynan Islam Ámirligimen jaqsy qarym-qatynas ornatqan, ekinshi jaǵynan, qazaq kompaniialarynyń taý-ken salasyndaǵy áleýeti jetkilikti.
«Aýǵanstan paidaly qazbalarǵa bai jáne bul bailyqtardy el ishinde óńdeý men óndirý jumystaryn halyqaralyq standarttarǵa sai júrgizý úshin iri kompaniialarmen yntymaqtasýda».
Osy oraida keibir ekonomikalyq sarapshylar sheteldik investitsiialar Aýǵanstan ekonomikasynyń ósýine, jumys oryndarynyń ashylýyna jáne infraqurylymnyń damýyna septigin tigizýi múmkin ekenin alǵa tartady.
Ekonomikalyq sarapshy Abdýl Nasir Reshtiianyń aitýynsha, saiasi máseleler sheshilip, Aýǵanstan halyqaralyq qaýymdastyq tarapynan resmi túrde tanylǵan jaǵdaida, jahandyq, óńirlik jáne kórshiles elder bul elge investitsiia quiýǵa umtylady.
Taǵy bir ekonomist Kotbýddin Iakýbidiń sózinshe, Aýǵanstan men Qazaqstandaǵy bar áleýetti eskersek, bul seriktestik aýǵan paidaly qazbalaryn barlaý, óndirý jáne óńdeý isinde mańyzdy ári tiimdi ról atqara alady.
Bul bastama Qazaqstan prezidenti Qasym-Jomart Toqaevtyń Aýǵanstan boiynsha arnaiy ókilimen kezdesýinde Islam Ámirliginiń resmi tulǵalarymen ekijaqty yntymaqtastyqty keńeitý qajettigin atap ótkeninen keiin qolǵa alynyp otyr.
Qazaqstan men Aýǵanstan Ortalyq jáne Ońtústik Aziiany bailanystyratyn temirjol jelisin salý jáne ony paidalaný boiynsha negizgi qaǵidalar jóninde ózara túsinistik týraly memorandýmǵa qol qoidy.
