Ádilet ministrligi boryshkerlerdiń shottary ne úshin jáne qalai buǵattalatynyn, al mundai jaǵdaida qaryzdy óz betimen nege jabýǵa bolmaitynyn egjei-tegjeili túsindirdi, dep habarlaidy Dalanews.kz.
Ádilet ministri "Aq jol" partiiasy depýtattary atynan óz vedomstvosyna kelip túsken saýalǵa jaýap berdi. Depýtattar maýsym aiynyń basynda ózderine qazaqstandyqtardyń shottarynyń buǵattalýyna bailanysty jappai shaǵym kelip túsip jatqandyǵyn aitqan. Májilis depýtaty Serik Erýbaev sot oryndaýshylary qaryz somasyn ǵana emes, shottaǵy barlyq qarajatty da buǵattaitynyn aityp, bul qazaqstandyqtardyń quqyqtaryn buzý, tipti olardy kúnkóris aqshasynsyz qaldyrýy dep esepteitinin jetkizgen. Osyǵan bailanysty fraktsiia zańnamada shotty ishinara buǵattaý qaǵidatyn bekitýdi usyndy:
- qarajatty qoljetimdi qaryz somasy sheginde shekteý jáne bul týraly boryshkerlerdi aldyn-ala habarlaý.
- óndirip alýdyń naqty somasyn kórsetý;
- qaryzdy erikti túrde óteý merzimin qarastyrý;
- shottaǵy barlyq qarajatty tolyǵymen buǵattaý tájiribesin múlde joiý.
Ádilet ministri Erlan Sársembaevtyń depýtattardyń saýalyna bergen resmi jaýaby jariialandy. Onda zańǵa sáikes sot oryndaýshysy ekinshi deńgeidegi bankterden boryshkerlerdiń shottaryndaǵy aqsha qaldyqtary týraly aqparat surai alatyny aitylady. Ministrdiń aitýynsha, zań boiynsha, ol óndirip alynatyn somaǵa para-par boryshkerge tiesili barlyq múlikke tyiym salýǵa quqyly. Atqarýshylyq qujatty oryndaý úshin sot oryndaýshysy prokýrordyń sanktsiiasyn alýy kerek. Prokýror sanktsiia bergen soń sot oryndaýshysynyń qaýlysynda tyiym salynatyn aqsha somasy kórsetiledi.
"Boryshkerdiń banktik shotyndaǵy aqshaǵa sanktsiialaǵan atqarýshylyq qujatta kórsetilgen somamen qatar, ony oryndaýǵa jáne jeke sot oryndaýshysynyń qyzmetine ketken shyǵystardy eskere otyryp, tyiym salynady", - dep sendiredi Sársembaev.
Óndirip alý somasy qujatta kórsetiledi
Óndirip alý somasyna qatysty ministr qazir de zańnamaǵa sáikes, atqarýshylyq qujatta boryshkerdiń oryndaýyna jatatyn talaptardy kórsetý sot oryndaýshysynyń atqarýshylyq qujatty oryndaýǵa qabyldaýynyń mindetti sharty bolyp tabylatynyn atap ótti. Qujat atqarýshylyq qujattarǵa qoiylatyn talaptarǵa sáikes kelmegen jaǵdaida, sot oryndaýshysy oǵan qujat kelip túsken kúnnen bastap úsh jumys kúni ishinde atqarýshylyq is júrgizýdi qozǵaýdan bas tartýǵa quqyly.
Boryshty ótegen soń shottar 30 minýt ishinde ashylady
Sársembaevtyń aitýynsha, eger boryshker óz qaryzyn banktiń mobildi qosymshasy arqyly ótese, onda shot 30 minýt ishinde buǵattan bosatylady. Eger atqarýshylyq is júrgizý toqtatylsa, onda sot oryndaýshysy bir táýlik ishinde qujatty sotqa jáne basqa da memlekettik organdarǵa joldap, boryshkerge qatysty májbúrleý sipatyndaǵy sharalar toqtatylady.
Qaryzdy óz erkimen óteýge bolmaidy
Ádilet ministri qazirgi tańda bereshekti erikti túrde óteý boiynsha múmkindik qarastyrylmaǵanyn moiyndaidy.
"Eger buryn boryshker atqarýshylyq sanktsiiany óndirip almai jáne jeke sot oryndaýshysynyń qyzmetine aqy tólemei, 5 kúntizbelik kún ishinde atqarýshylyq qujattyń talaptaryn oryndaý múmkindigine ie bolsa, búgingi kúni Zań sheńberinde erikti túrde oryndaý uǵymy joq jáne atqarýshylyq qujatty oryndaýǵa usynǵanǵa deiin ony erikti túrde oryndaý múmkindigi kózdeledi dep boljanady", - dep sózin túiindeidi ministr.
