Memlekettik qyzmetkerler de Perizat Qairatqa senip, aqsha aýdarǵan, dep habarlaidy Dalanews.kz.
Sot otyrysynda Mańǵystaý oblysy Qazynashylyq departamentiniń basshysy Manarbek Býharbaevtyń jaýaby oqyldy. 2024 jylǵy sáýir aiynda vedomstvo qyzmetkerleri tasqynnan zardap shekkenderge kómek retinde 231 500 teńge jinap, ony BizBirgemiz Qazaqstan 2030 qoǵamdyq birlestigine aýdarǵan.
«Jinalǵan qarajatty aýdarý úshin men Aqtaýdaǵy Forte Bank bólimshesine bardym. Qarajatty Mańǵystaý oblysy Qazynashylyq departamentiniń atynan aýdarý kerek ekenin aitqanymda, bank qyzmetkerleri muny júzege asyra almaityndaryn jetkizdi de, meniń atymnan shot ashýdy usyndy. Men atymnan esepshot ashyp, sol arqyly qoǵamdyq birlestiktiń esepshotyna aqsha aýdardym. Keiin atalǵan qoǵamdyq birlestik basshysyna qatysty alaiaqtyq faktisi boiynsha qylmystyq is qozǵalyp, tergeý júrip jatqanyn estigen soń, zańnamalyq sharalar qabyldap, aýdarylǵan qarjyny qaitarýdy suraimyn», – delingen Býharbaevtyń kórsetiliminde.
Basqa jábirlenýshiler siiaqty, qazynashy da aýdarylǵan qarajattyń tasqynnan zardap shekkenderge jetkenin teksermegen.
Sot protsesi jabyq formatta jalǵasýda. Eske salaiyq, Perizat Qairatqa qatysty is jartylai ashyq rejimde qaralyp jatyr: bank qupiiasy men qupiia aqparatqa qatysty bólimder jabyq esik jaǵdaiynda, jýrnalisterdiń qatysýynsyz ótýde.
