Batys Qazaqstan oblysy, Syrym aýdany, Shaǵyrloi aýylynda jańa feldsherlik-akýsherlik pýnkt qoldanysqa berildi,- dep habarlaidy Dalanews.kz
Saltanatty sharaǵa Batys Qazaqstan oblysynyń ákimi Nariman Tóreǵaliev qatysyp, aýyl turǵyndaryn meditsinalyq nysannyń ashylýymen quttyqtady.
"Prezidentimiz Q.K.Toqaev Qazaqstan halqyna arnaǵan Joldaýynda «Elimizdiń basty qundylyǵy – adam. Ult densaýlyǵy jaqsy bolsa ǵana, qoǵam ornyqty damidy» dep atap ótken bolatyn. Búgin Syrym aýdanynyń Shaǵyrloi aýylyndaǵy jańa feldsherlik-akýsherlik pýnkttiń ashylýy – barshamyz úshin qýanyshty oqiǵa. Endi aýyl turǵyndary sapaly ári ýaqytyly meditsinalyq kómekke qol jetkize alady. Bul nysan analar men balalardyń, jalpy aýyl turǵyndarynyń saýlyǵyn nyǵaitýǵa óz úlesin qosady dep senemin",-dedi oblys ákimi Nariman Tóreǵaliev.
Jalpy 2023-2025 jyldary oblysta 50 jańa meditsinalyq nysan salý kózdelgen bolsa, sonyń 45-shi Shaǵyrloi aýylynda iske qosyldy.
Shaǵyrloi aýylyndaǵy jalpy aýmaǵy 260 sharshy metrden asatyn jańa nysan zamanaýi meditsinalyq qural-jabdyqtarmen jabdyqtalǵan. Munda kúnine 40 adam qabyldana alady.
Aýyl turǵyndary da jańa nysannyń ashylýyn qýanyshpen qarsy aldy.
"Buryn aýyldan qatynap, alysqa barýǵa týra keletin. Endi dárigerge júginý jeńildedi. Jańa ǵimarat jaryq, keń, barlyq jaǵdai jasalǵan. Osyndai qamqorlyq úshin Memleket basshysyna alǵysymyz sheksiz", – deidi aýyl ardageri Saǵidoqas Baqtyǵaliev.
Joba aýyldyq aimaqtarda meditsinalyq infraqurylymdy damytýǵa baǵyttalǵan júieli jumystyń nátijesi. Mundai nysandar shalǵai aýyl turǵyndarynyń ómir sapasyn arttyrýǵa jáne densaýlyq saqtaý qoljetimdiligin qamtamasyz etýge sep bolady.
