Jambyl oblysy boiynsha QR Bas prokýratýrasynyń Quqyq qorǵaý organdarynyń qyzmetin úilestirý departamentiniń qyzmetkeri Áliia Qojabekova Prezidentke kezekti videoúndeý joldady, dep habarlaidy Dalanews.kz.
Ol Bas prokýratýrada óziniń birneshe videoúndeýinen keiin beiindi bólimderdiń qatysýymen tekserýler júrgizilgenin aitty. Bul tekserýler nátijesinde Jambyl oblysy boiynsha Komitet departamentiniń basshysy Seker Búrkitbaev qyzmetinen bosatylǵan. Qazir ol Bas prokýratýranyń qaramaǵynda.
Áliia Qojabekovanyń aitýynsha, eskertý alyp, artynsha óz erkimen qyzmetten ketýge ótinish bergen adamnyń áreketi – onyń basshy retinde qabiletsizdigin dáleldeidi jáne bul ony prokýratýra organdarynan teris sebeptermen shyǵarý úshin negiz bolýǵa tiis.
"Sol sebepti men Bas prokýratýradan Búrkitbaevty prokýratýra qatarynan teris sebeptermen jumystan shyǵarý sharalaryn qabyldaýdy suraimyn", – dedi ol.
Onyń aitýynsha, qyzmetkerlerden estigen derekke súiensek, Búrkitbaevqa Bas prokýratýranyń Quqyqtyq statistika jáne arnaiy esep komitetinen jańa laýazym usynylǵan, keiin ol burynǵy qyzmetine – Jambyl oblysy departamentiniń basshysy retinde qaita oralýy múmkin.
Qojabekova 2025 jyldyń 18 sáýirinen beri «Búrkitbaevtyń arqasynda» tek «ókimimen» otyrǵanyn aityp, ózine bos laýazym usynylmaǵanyn jetkizdi.
"Bul qalai? Men komitet tóraǵasy Nurlybai Sábitpen birneshe ret sóilesýge tyrystym, biraq ol ádeii sóilesýden qashady. Tipti 15 shildede onyń kómekshisi Gabiden arqyly jumys telefonyna habarlastym, biraq ol báribir sóilesýge shyqpady. Bul Komitet basshylyǵynyń menimen ashyq dialogqa jáne kompromiske barǵysy kelmeitinin kórsetedi", – dedi ol.
Ol 8 shildede Bas prokýratýraǵa bos turǵan departament basshysy qyzmetine taǵaiyndaýdy surap ótinish bergenin aitty. Alaida kadr bólimi ótinishti komitetke qaita baǵyttaǵan. Komitet bolsa Jambyl oblysynan basqa óńirden qyzmet usynǵan.
Qojabekova óziniń otbasylyq jaǵdaiy, kámelet jasyna tolmaǵan balalary bar ekenin, tájiribesi men eńbek ótili eskerilmeitinin, áiel retinde óz ujymynda jumys istegisi keletinin aitty.
"Men elge, halyqqa, memleketke qyzmet etkim keledi. Biraq maǵan ondai múmkindik bermei otyr", – dedi ol.
Onyń sózine qaraǵanda, keibir qyzmetkerler arasynda Qojabekovaǵa qarsy naýqan júrgizilip jatyr, ujymnyń atynan aryz-shaǵym jazylyp, BAQ arqyly nemese petitsiia retinde taratý josparlanǵan.
"Al «ujym» dep otyrǵandary – departament basshysy mindetin atqarýshy Baqytjan Qalybaev, bólim basshylary Izmagambetova, Bahtiiar Qalyspaev, Kentbaeva. Olar óz qaramaǵyndaǵy qyzmetkerlerden maǵan qarsy qol jinaǵan. Bul adamdar ózderi zań buzýǵa jol bergen tulǵalar dep sanaimyn. Sonda osy áreketteri arqyly ujymda alaýyzdyq pen jik shyǵaryp otyrǵan ózderi emes pe?", – dedi Qojabekova.
Qojabekovanyń oiynsha, munyń bári Komitet tóraǵasy Nurlybai men onyń orynbasary Mirazovtyń kelisimimen nemese qoldaýymen bolyp jatyr. Olar túrli jiyndarda Qojabekovany el aldyna qaralaý úshin ádeii áreket jasap otyrǵan kórinedi.
"Olar minberden meni kinálap, "ishki jaǵdaidy syrtqa shyǵardy" dep sógip otyr. Biraq men tek zańsyzdyqtardy jariia ettim", – dedi ol.
Ol qazirgi ýaqytta Jambyl oblysy departamentiniń basshysy mindetin atqaryp otyrǵan Baqytjan Qalybaevqa qatysty da másele kóterdi. Aitýynsha, Qalybaev 2013 jyly sottylyq týraly derekterdi óshirýge bailanysty isti bolǵan, ol kezde onyń jubaiynyń týysy bazalarǵa zańsyz qol jetkizgen. Sonyń saldarynan Qalybaev pen Izmagambetova tek qatań eskertý alyp qutylǵan.
Ol Qalybaevtyń buryn da zańsyz túzetýler jasaǵanyn, sonda da qazir basshylyqta otyrǵanyn synǵa aldy.
"Bul qalai? Nelikten zań talaptaryna sáikes Qalybaev pen Izmagambetova qyzmetterinen ýaqytsha shettetilmedi?" – dedi ol.
Ol buǵan Mirazov pen Nurlybaidyń yqpaly sebep bolýy múmkin ekenin aitty. Qojabekova budan bólek, Mirazovtyń burynǵy qyzmetinen zańbuzýshylyqtar úshin bosatylǵanyn, alaida keiin prokýratýraǵa qaita qyzmetke turǵanyn eske saldy.
"Sonda mundai adamdar qalaisha prokýror qyzmetine qaita kele alady? Olar qandai eńbegimen qaita taǵaiyndalyp otyr? Álde qudasy bolǵany úshin be?", – dedi Qojabekova.
Ol Búrkitbaevtyń da ýaqytsha ketip, keiin qyzmetine qaita oralady degen qaýesetti rastaýǵa bolatynyn, tipti Qalybaevtyń laýazym úshin 10 mln teńge berýge daiyn degen sózderdiń de shyndyqqa janasatynyn aitty.
"Al men sekildi adamǵa zań boiynsha bos oryn usynylýy tiis bolsa da, maǵan basqa óńirlerden ǵana qyzmet usynyp otyr. Bul ádiletti me?", – dedi ol.
Ol Bas prokýratýranyń tekserýinen keiin keibir qyzmetkerler tártiptik jaza alǵanymen, Jambyl oblysy departamentinde eshkim jaýapkershilikke tartylmaǵanyn, buǵan Mirazov pen Nurlybaidyń "qoldaýy" sebep dep sanaitynyn jetkizdi.
"Prezident 23 maýsymda quqyq qorǵaý organdarynyń keńeitilgen otyrysynda naqty tapsyrma berdi. Komitet jańaryp, qylmystyń aldyn alatyn, taldaityn, úilestirýshi organǵa ainalýy kerek. Al bul úshin bári basshylyqtan bastalýy qajet. «Balyq basynan shiridi» demei me? Meniń úndeýimdi eskerip, Asylov pen aty atalǵan tulǵalarǵa shara qoldanýdy suraimyn. Jambyl oblysy boiynsha departamentten bos jumys orny usynylyp, meniń otbasylyq, jeke jáne kásibi jaǵdaiym eskerilsin – dedi Qojabekova.
Eske salaiyq, Áliia Qojabekova buǵan deiin de óńirdegi bylyqtar týraly aityp, úndeý jasaǵan bolatyn.
Sonymen qatar, áleýmettik jelilerde Qojabekovanyń málimdemesinen keiin departament basshysy jumystan ketti.
