Qazaqstannyń halyq jazýshysy, belgili dramatýrg jáne talantty sazger Israil Saparbai 85 jasqa qaraǵan shaǵynda ómirden ozdy, dep habarlaidy Dalanews.kz.
Qaraly habardy Jazýshylar odaǵy tóraǵasynyń orynbasary Qasymhan Begmanov Facebook paraqshasynda habarlady.
"Búgin tańsáride sýyq habar jetti. Tańǵy tórttiń shamasynda Israil Saparbai aǵamyz Qaskeleńdegi qara shańyraǵynda, otbasy men bala-shaǵasynyń kóz aldynda aýyr naýqastan qaitys boldy. Bul jaiynda maǵan uly Nurlan Israiluly habarlady", – dep jazdy Begmanov.
Táýelsiz «Platinaly Tarlan» syilyǵynyń laýreaty, qazaq poeziiasynyń kórnekti ókili Israil Saparbaidyń artynda syrshyl óleńderi, júrekke jol tapqan sazdy ánderi men teatr sahnasynda óz ornyn tapqan pesalary qaldy. Ol qazaq ádebietinde ózindik qoltańbasyn qaldyrǵan, esimi el jadynda saqtalatyn tulǵa.
